వాషింగ్టన్: అమెరికా గగనతలంపై మరో గుర్తుతెలియని వాహనం చక్కర్లు కొట్టింది. మొన్న అలస్కాలో, నిన్న కెనడా బార్డర్ దగ్గర్లో.. ఇప్పుడేమో మిషిగాన్ లోని లేక్ హూరన్లో గుర్తుతెలియని వాహనం కనిపించడంతో అమెరికా ఆర్మీ అలర్టయింది. ప్రెసిడెంట్ బైడెన్ సూచనలతో సదరు వాహనాన్ని కూల్చేశామని నార్త్ అమెరికన్ ఏరోస్పేస్ డిఫెన్స్ కమాండ్(నోరాడ్) హెడ్ జనరల్ గ్లెన్ వాహెర్క్ వెల్లడించారు. చైనా స్పై బెలూన్ కూల్చివేత తర్వాత కేవలం మూడు రోజుల వ్యవధిలో చోటుచేసుకున్న మూడో ఘటన ఇది. దీంతో అమెరికన్లలో భయాందోళనలు నెలకొన్నాయి. ఆర్మీ కూల్చేసిన అనుమానిత వాహనాలు గ్రహాంతరవాసుల(ఏలియన్స్) కు చెందినవని అగ్రరాజ్యంలో ప్రచారం జరుగుతోంది. దీనిపై నోరాడ్ బాస్ జనరల్ గ్లెన్ వాహెర్క్మాట్లాడుతూ.. అనుమానిత వస్తువులను కూల్చివేసిన ఘటనలకు సంబంధించి ఇంకా వివరాలు అందలేదని తెలిపారు. ప్రస్తతం ఏ విషయాన్నీ కొట్టిపారేయలేమని చెప్పారు. ఏలియన్స్ వచ్చారని జరుగుతున్న ప్రచారాన్ని కొట్టిపారేసేందుకు కానీ, నిజమేనని ధ్రువీకరించేందుకు కానీ తమ వద్ద ఎలాంటి ఆధారాలు లేవని చెప్పారు.
నిలిచిన విమానాల రాకపోకలు..
మిషిగాన్ గగనతలంపై అనుమానిత వాహనాన్ని గుర్తించడంతో ముందు జాగ్రత్త చర్యగా ఆ మార్గంలో ప్రయాణించాల్సిన విమానాలపై అధికారులు ఆంక్షలు విధించారు. ఎయిర్ స్పేస్ మూసేశారు. సదరు వాహనాన్ని కూల్చేసిన కాసేపటికి తిరిగి ఓపెన్ చేశారు. కూల్చివేత సందర్భంగా కింద ఉన్న నివాస ప్రాంతాలపై శకలాలు పడకుండా అధికారులు జాగ్రత్తలు తీసుకున్నారు. అదేవిధంగా ఆ శిథిలాలను సేకరించి, విశ్లేషిస్తున్నట్లు తెలిపారు. ఆ వాహనాలు ఏంటి.. వాటిని ఎవరు పంపించారనే వివరాలు వెల్లడి కావడానికి మరికొంత సమయం పడుతుందని అధికారులు వివరించారు. భూమ్మీద ఉన్న ప్రాంతాలపై నిఘా పెట్టే సామర్థ్యం ఈ వాహనాలకు ఉందా..? లేదా అనేది పరీక్షించి చూడనున్నట్లు అధికారులు తెలిపారు. అయితే, ఈ అనుమానాస్పద వాహనాలు గ్రహాంతరవాసులకు చెందినవని ప్రచారం జరుగుతోంది.. మీరేమంటారని జనరల్ వాహెర్క్ ను మీడియా ప్రతినిధులు ప్రశ్నించారు. ఏలియన్స్ వాహనాలా.. ఏమో అయుండొచ్చని, ఇప్పుడే ఏమీ చెప్పలేమని జనరల్ వాహెర్క్ దాటవేశారు.
