కీవ్: ఉక్రెయిన్‌‌పై రష్యా వార్ ప్రారంభించి ఆరు నెలలైంది. ఒకప్పుడు రష్యా అధ్యక్షుడు పుతిన్ ఉక్రెయిన్కు ఇండిపెండెన్స్ డే విషెస్ చెప్పారు. ఇది సోషల్ మీడియాలో వైరల్ అవుతున్నది. ఆగస్ట్ 24, 2007 నాటి క్రెమ్లిన్ పత్రికా ప్రకటన ప్రకారం.. సోవియట్ యూనియన్ నుంచి స్వాతంత్ర్యం పొందిన ఉక్రెయిన్కు 16వ స్వాతంత్ర్య దినోత్సవం సందర్భంగా అప్పటి ఉక్రెయిన్ అధ్యక్షుడు విక్టర్ యుష్చెంకోకు "గౌరవంగా" అభినందన సందేశాన్ని పుతిన్ పంపారు. "మన ప్రజలు శతాబ్దాల ఆధ్యాత్మిక, సాంస్కృతిక సంబంధాలు కలిగి ఉన్నారు. అందరూ స్నేహపూర్వక సంబంధాలతో ముడిపడి ఉన్నారు" అని పుతిన్ లేఖలో పేర్కొన్నారు. "ఈ రోజు ఉన్న స్థిరత్వం, స్థిరమైన అభివృద్ధి, ఉక్రెయిన్ ప్రభుత్వాన్ని బలోపేతం చేస్తాయి. ఇవి ప్రజాస్వామ్య సూత్రాలు. మన రెండు దేశాల ప్రధాన ప్రయోజనాలకు సంబంధించినవని నేను నమ్ముతున్నాను" అని పుతిన్ చెప్పారు.
భద్రతామండలిలో రష్యాకు వ్యతిరేకంగా ఇండియా ఓటు
వాషింగ్టన్: ఉక్రెయిన్ యుద్ధం విషయంలో ఐక్యరాజ్యసమితి భద్రతా మండలి(యూఎన్ఎస్సీ)లో ఇండియా తొలిసారిగా రష్యాకు వ్యతిరేకంగా ఓటేసింది. ఉక్రెయిన్ 31వ ఇండిపెండెన్స్ డే (ఆగస్టు 24) సందర్భంగా బుధవారం యూఎన్ఎస్సీలో ఆ దేశ అధ్యక్షుడు వొలోదిమిర్ జెలెన్ స్కీ వీడియో కాన్ఫరెన్స్ ద్వారా ప్రసంగించడాన్ని వ్యతిరేకిస్తూ రష్యా ప్రొసీజరల్ ఓటింగ్ను కోరింది. ఓటింగ్ నిర్వహించగా.. 15 సభ్యదేశాల్లో ఇండియా సహా 13 దేశాలు జెలెన్ స్కీ ప్రసంగానికి మద్దతుగా ఓటేశాయి. చైనా గైర్హాజరు అయింది.
