గచ్చిబౌలి, వెలుగు: హైదరాబాద్ ఐటీ కారిడార్లో ట్రాఫిక్ రద్దీని తగ్గించేందుకు రాష్ట్ర ప్రభుత్వం ఫ్లైఓవర్లు, అండర్ పాస్ల నిర్మాణాలను స్పీడప్ చేస్తున్నది. ఈ నిర్మాణ పనులను వేగంగా పూర్తి చేసేందుకు ఐఐఐటీ జంక్షన్ మార్గంలో ఏడాది పాటు ట్రాఫిక్ డైవర్షన్ అమలు చేస్తున్నట్లు సైబరాబాద్ పోలీస్ కమిషనర్ డా. ఎం. రమేశ్ బుధవారం ఉత్తర్వులు జారీ చేశారు. ఈ ట్రాఫిక్ మళ్లింపులు ప్రతిరోజూ ఉదయం 8 గంటల నుంచి రాత్రి 9 గంటల వరకు అమలులో ఉండనున్నాయి. ఐటీ ఉద్యోగులు, సాధారణ ప్రజలు నిర్మాణ పనులకు సహకరిస్తూ ఈ ప్రత్యామ్నాయ మార్గాలను అనుసరించాలని ట్రాఫిక్ ఉన్నతాధికారులు కోరారు.
ప్రత్యామ్నాయ మార్గాలు ఇవే:
గచ్చిబౌలి జంక్షన్ నుంచి లింగంపల్లి వైపు వెళ్లే వాహనదారులు.. ఐఐఐటీ జంక్షన్ నుంచి విప్రో జంక్షన్ వైపు వెళ్లి, అక్కడ రైట్ టర్న్ తీసుకొని గౌలిదొడ్డి, గోపన్పల్లి జంక్షన్, నల్లగండ్ల మీదుగా లింగంపల్లికి చేరుకోవాలి.
గోపన్పల్లి తండా, గౌలిదొడ్డి, క్యూసిటీ, కోకాపేట నుంచి విప్రో జంక్షన్ మీదుగా ఐఐఐటీ జంక్షన్ వైపు వచ్చే వాహనదారులు.. విప్రో జంక్షన్ నుంచి నానక్రాంగూడ రోటరీ-2 వద్ద లెఫ్ట్టర్న్ తీసుకొని ఓఆర్ఆర్ మీదుగా గచ్చిబౌలి జంక్షన్కు చేరుకోవాలి.
లింగంపల్లి వైపు నుంచి గచ్చిబౌలి జంక్షన్ వైపు వెళ్లే వాహనదారులు.. హెచ్సీయూ బస్ డిపో వద్ద ఎడమ వైపునకు తిరిగి మజీద్బండ, శ్రీరాంనగర్, బొటానికల్ గార్డెన్ జంక్షన్ మీదుగా అంజయ్యనగర్ గుండా గచ్చిబౌలి వైపు చేరుకోవాలి.
