బీజింగ్ : ఓ స్టూడెంట్ తన కోర్సులో భాగంగా వరుస గా 5 రాత్రులు నిద్రపోకుండా లైవ్ స్టీమింగ్లో గేమ్ ఆడి ప్రాణాలు కోల్పోయాడు. ఈ ఘటన చైనాలోని హెనాన్ ప్రావిన్స్‌‌లో చోటుచేసుకుంది. లి హావో అనే యువకుడు తన ఫ్రెండ్స్తో కలిసి జెంగ్జూ సిటీలో అద్దెకుంటున్నాడు. హెనాన్స్ పింగ్‌‌డింగ్‌‌షాన్ వొకేషనల్ అండ్ టెక్నికల్ కాలేజీలో పైనల్ ఇయర్ చదువుతున్నాడు. ఇంటర్న్‌‌షిప్ కోసం ఓ మీడియా సంస్థలో చేరాడు.
ఇందులో భాగంగా లి హావో 26 రోజుల్లో 240 గంటల పాటు లైవ్ స్ట్రీమింగ్ గేమింగ్ చేయాల్సి ఉంటుంది. ఈ నెల 5 నుంచి లి హావో నైట్ షిఫ్ట్‌‌కి మారాడు. రాత్రి 9 నుంచి ఉదయం 6 గంటల దాకా వరుసగా 5 రాత్రులు పనిచేశాడు. దీంతో ఈ నెల 10న రూమ్ లో చలనం లేకుండా పడిపోయిన లి హావోను అతడి ఫ్రెండ్స్ ఆస్పత్రికి తరలించారు. అయితే, లిహావో అప్పటికే చనిపోయినట్లు డాక్టర్లు వెల్లడించారు.
