తొర్రూరు, వెలుగు : తొర్రూరు పట్టణాన్ని అన్ని రంగాల్లో అభివృద్ధి చేసే బాధ్యత తమదని, ఓటు వేసే బాధ్యత మీదంటూ పాలకుర్తి ఎమ్మెల్యే యశస్వినిరెడ్డి, టీపీసీసీ వైస్ చైర్మన్ ఝాన్సీరెడ్డి ప్రచారం చేశారు. ఆదివారం మున్సిపల్ ఎన్నికల ప్రచారంలో భాగంగా పట్టణంలోని 12వ వార్డు కాంగ్రెస్ బలపర్చిన అభ్యర్థి కేతవత్ శ్రేయ ఓమేశ్, 9వ వార్డు అభ్యర్థి పంజా కల్పన తరఫున ఇంటింటి ప్రచారం నిర్వహించారు. ఈ సందర్భంగా వారు మాట్లాడుతూ గత పాలనలో తొర్రూరు పూర్తిగా నిర్లక్ష్యానికి గురైందని విమర్శించారు. కాంగ్రెస్ అధికారంలోకి వచ్చిన రెండేండ్లలోనే ఇంటింటికీ ప్రభుత్వ సంక్షేమ ఫలాలు అందుతున్నాయన్నారు.
తొర్రూరు పట్టణాన్ని అన్ని రంగాల్లో ఆదర్శవంతంగా తీర్చిదిద్దుతామని అన్నారు. అభివృద్ధి నిరంతరం కొనసాగాలంటే మున్సిపల్ ఎన్నికల్లో కాంగ్రెస్ అభ్యర్థులను అత్యధిక మెజార్టీతో గెలిపించాలని కోరారు. అనంతరం పట్టణంలోని సీపీఐ అనుబంధ సంఘం మీటింగ్లో ఎమ్మెల్యే యశస్వినిరెడ్డి పాల్గొని మాట్లాడుతూ తొర్రూరు పట్టణ సమగ్ర అభివృద్ధే లక్ష్యంగా కాంగ్రెస్, సీపీఐ కలిసి పని చేయాల్సిన అవసరం ఉందన్నారు. కార్యక్రమంలో కాంగ్రెస్, సీపీఐ నాయకులకు, కార్యకర్తలు తదితరులు పాల్గొన్నారు.
