- యువజన కాంగ్రెస్ రాష్ట్ర కార్యవర్గ సమావేశంలో పీసీసీ చీఫ్ మహేశ్ గౌడ్
హైదరాబాద్, వెలుగు: యూత్ కాంగ్రెస్సే పార్టీకి భవిష్యత్తు అని పీసీసీ చీఫ్ మహేశ్ గౌడ్ అన్నారు. శనివారం గాంధీ భవన్ లో నిర్వహించిన యూత్ కాంగ్రెస్ రాష్ట్ర కార్యవర్గ సమావేశానికి ఆయన ముఖ్య అతిథిగా హాజరయ్యారు. ఈ సందర్భంగా మాట్లాడుతూ.. రానున్న రోజుల్లో యూత్ కాంగ్రెస్ నేతలే కాంగ్రెస్ పార్టీకి సమర్థవంతమైన నాయకత్వాన్ని అందిస్తారని చెప్పారు.
ఇప్పుడు కాంగ్రెస్ కు జాతీయ, రాష్ట్ర స్థాయిలో నాయకత్వ బాధ్యతల్లో ఉన్న నేతలంతా గతంలో ఎన్‌‌‌‌‌‌‌‌ఎస్‌‌‌‌‌‌‌‌యూఐ, యూత్ కాంగ్రెస్ లో పనిచేసిన వారేనని గుర్తు చేశారు. ఈ రెండు విభాగాల్లో కష్టపడి పనిచేసిన వారికి కాంగ్రెస్ లో మంచి భవిష్యత్తు ఉంటుందని చెప్పారు. యూత్ కాంగ్రెస్ నాయకులు క్షేత్ర స్థాయిలో పనిచేస్తేనే ప్రజా సమస్యలపై అవగాహన ఏర్పడుతుందని, జనం నాడి తెలుస్తుందని చెప్పారు.
నిత్యం జనం మధ్య ఉండాలని, జనాదరణ ఉన్న వారే ఉన్నత పదవుల్లో ఉంటారని పీసీసీ చీఫ్ చెప్పారు. యూత్ కాంగ్రెస్ నేతలు సర్పంచ్, ఎంపీటీసీ, జడ్పీటీసీ ఎన్నికల్లో పోటీ చేయాలని సూచించారు. యూత్ కాంగ్రెస్ రాష్ట్ర ఇన్చార్జ్మనీష్ శర్మతో పాటు పలువురు రాష్ట్ర నాయకులు పాల్గొన్నారు.
