హైదరాబాద్, వెలుగు: సామాజిక న్యాయ సాధన కోసం కాంగ్రెస్ ఓబీసీ విభాగం ఆధ్వర్యంలో ఈ నెల 25న ఢిల్లీలోని తల్కటోరా స్టేడియంలో నిర్వహించనున్న ‘భాగీదారీ న్యాయ సమ్మేళనం’ ప్రోగ్రాంకు తెలంగాణ నుంచి బీసీ నేతలు, కార్యకర్తలు పెద్ద సంఖ్యలో తరలిరావాలని పీసీసీ చీఫ్మహేశ్ కుమార్ గౌడ్ పిలుపునిచ్చారు. గాంధీ, పూలే కలలను సాకారం చేసే దిశగా జరగనున్న ఈ సమ్మేళనంలో పాల్గొనాలనుకునే వారు మీ జిల్లా నుంచి పేరు నమోదు చేసుకోవాలని సోమవారం ఒక ప్రకటనలో సూచించారు.
లేదంటే ఈ ప్రోగ్రాంకు అనుమతించరని తెలిపారు. ఈ సమ్మేళనం దేశంలో ఓ కొత్త అధ్యాయానికి నాంది కాబోతుందని, ఈ చారిత్రక ఘట్టానికి మీరు సాక్ష్యంగా నిలిచేందుకు ముందుగానే మీ పేరు నమోదు చేసుకొని పెద్ద సంఖ్యలో తరలిరావాలని పిలుపునిచ్చారు.
అచ్యుతానందన్ మృతిపై సంతాపం
కేరళ మాజీ సీఎం అచ్యుతానందన్ మృతిపై మహేశ్ గౌడ్ సంతాపాన్ని ప్రకటించారు. సుదీర్ఘ రాజకీయ అనుభవం ఉన్న శతాధిక కమ్యూనిస్టు నేత అచ్యుతానందన్ మరణం జాతీయ రాజకీయాలకు తీరని లోటని ఆయన పేర్కొన్నారు.
