- కర్నాటకలో పేరెంట్స్ నిర్వాకం.. బాలల హక్కుల సంఘం ఫైర్
బెంగళూరు: జైలు శిక్ష అనుభవిస్తున్న కన్నడ యాక్టర్ దర్శన్లాగా తమ చిన్నారిని రెడీ చేసి ఫొటో షూట్ చేసిన తల్లిదండ్రులపై కర్నాటక రాష్ట్ర బాలల హక్కుల సంఘం ఫైర్ అయింది. వాళ్ల మీద బుధవారం కేసు నమోదు చేసింది. ఆ తల్లిదండ్రుల ఆచూకీ తెలియజేయాలని పోలీసులను కోరింది. ఓ జంట తమ చిన్నారిని ఫొటో షూట్ చేసేందుకు డిఫరెంట్ గెటప్లో రెడీ చేసింది. రేణుస్వామిని చంపిన కేసులో రిమాండ్ ఖైదీగా ఉన్న దర్శన్ను తలపించేలా.. తల్లిదండ్రులు తమ పిల్లాడికి ఖైదీని పోలిన డ్రెస్ కుట్టించారు.
దానిపై ఖైదీ నంబర్ ‘6106’ రాయించారు. బాలుడి చేతులకు సంకెళ్లు వేసి ఫొటో షూట్ చేసి సోషల్ మీడియాలో షేర్ చేశారు. ఈ ఫొటోలు వైరల్ కావడంతో బాలల హక్కుల సంఘం సుమోటోగా కేసు ఫైల్ చేసింది. ఇది జువైనల్ చట్టాన్ని అతిక్రమించడమేనని మండిపడింది. ఆ పేరెంట్స్ ను గుర్తించి యాక్షన్ తీసుకుంటామంది. కాగా, దర్శన్ ఖైదీ నంబర్ 6106 కర్నాటకలో ట్రెండ్ అవుతోంది. దర్శన్ అభిమానులు ఆ నంబర్ను టాటూగా వేయించుకుంటున్నారు. వెహికల్ రిజిస్ట్రేషన్లకు కూడా అదే నంబర్ను ఎంచుకుంటున్నారు. ‘ఖైదీ నంబర్ 6106’ టైటిల్ రిజిస్ట్రేషన్కు కూడా అప్లికేషన్లు వచ్చాయని కన్నడ ఫిల్మ్ చాంబర్ ప్రతినిధులు చెప్తున్నారు.
