హిమాచల్ ప్రదేశ్ రోహ్ తంగ్ దగ్గర నిర్మించిన అటల్ టన్నెల్ ను ప్రధానమంత్రి నరేంద్రమోడీ రేపు(శనివారం) ప్రారంభించనున్నారు. ఉదయం పదిగంటకు ఈ టన్నెల్ ను ఓపెన్ చేయనున్నారు. టన్నెల్ ఓపెనిగ్ తర్వాత సిస్సు, లాహౌల్ లో రెండు సభల్లో మాట్లాడనున్నారు. సొరంగంలో ప్రయాణించి లాహౌల్ లోయలోని నార్త్ సైడ్ చేరుకుంటారు. అక్కడ నుంచి దక్షిణ ద్వారానికి ప్రయాణించే హిమాచల్ ప్రభుత్వ బస్సు సర్వీసును ప్రారంభిస్తారు. మోడీ టూర్ క్రమంలో రోహ్ తంగ్ వెళ్లారు రక్షణ మంత్రి రాజ్ నాథ్ సింగ్. హిమాచల్ ప్రదేశ్ సీఎం జైరాం ఠాకూర్ తో కలిసి టన్నెల్ ను పరిశీలించారు. అందులో ప్రయాణించారు. తర్వాత అధికారులతో సమావేశమయ్యారు రాజ్ నాథ్.
మనాలి-లేహ్ జాతీయ రహదారిపై రోహ్ తంగ్ పాస్ దగ్గర 9 కిలోమీటర్ల 200 మీటర్ల అండర్ టన్నెల్ నిర్మించారు. 20 ఏళ్ల క్రితం అప్పటి ప్రధాని దివంగత వాజ్ పేయి ఈ ప్రాజెక్ట్ కు శంకుస్థాపన చేశారు. సొరంగ మార్గం నిర్మాణానికి 3వేల 300 కోట్లు ఖర్చుచేశారు. ఈ సొరంగంతో మనాలి- లేహ్ ల మధ్య 46 కిలోమీటర్ల దూరం తగ్గనుంది. దేశ రక్షణ పరంగా దీనికి వ్యూహాత్మక ప్రాముఖ్యత ఉంది. సరిహద్దుల్లో ఎలాంటి అత్యవసర పరిస్థితి తలెత్తినా ఈ టన్నెల్ నుంచి సైనిక వాహనాల్లో సామగ్రిని త్వరగా తరలించవచ్చు.
అటల్ టన్నెల్ కు ఎన్నో ప్రత్యేకతలున్నాయి. సముద్ర మట్టానికి 10 వేల అడుగుల ఎత్తులో 9 కిలోమీటర్ల 200 మీటర్లు ఈ సొరంగ మార్గం నిర్మించారు. ప్రపంచంలోనే ఎత్తైన ప్రాంతంలో నిర్మించిన సొరంగ మార్గాల్లో ఇదే అత్యంత పొడవైంది. టన్నెల్ లో ప్రతీ 150 మీటర్లకు టెలిఫోన్ , 60 మీటర్లకు అగ్నిమాపక వ్యవస్థ ఏర్పాటు చేశారు. ప్రతీ 500 మీటర్లకు అత్యవసర మార్గం, 250 మీటర్లకు ఒక సీసీ కెమెరా ఏర్పాటు చేశారు. టన్నెల్ లో వాహనాల రాకపోకలను ఎప్పటికప్పుడు పర్యవేక్షించేందుకు ప్రత్యేకంగా సిబ్బందిని ఏర్పాటు చేశారు.
