హైదరాబాద్, వెలుగు: కాంగ్రెస్ ఎంపీ అభ్యర్థుల ఎంపికలో ఆ పార్టీ అధిష్టానం మరో కీలక నిర్ణయం తీసుకుంది. రాష్ట్రంలో పెండింగ్లో ఉన్న 13 సీట్లలో అభ్యర్థుల ఎంపికపై పార్టీ రాష్ట్ర వ్యవహారాల ఇన్ చార్జ్ దీపాదాస్ మున్షీ బుధవారం అభిప్రాయ సేకరణ చేపట్టనున్నారు. పెండింగ్ సీట్ల జిల్లాల డీసీసీ అధ్యక్షులు, నియోజకవర్గ ఇన్చార్జిలతో సమావేశం కానున్నారు. లోక్సభ ఎన్నికల్లో పోటీ చేసే అభ్యర్థులు ఎవరైతే బాగుంటుందని నేతల అభిప్రాయాలు తీసుకోనున్నారు. వారి అభిప్రాయాలు సేకరించాక ఏఐసీసీకి పంపిస్తారని పార్టీ నేతలు చెప్తున్నారు. ఏఐసీసీ ఆదేశాల మేరకే ఈ మీటింగ్ నిర్వహిస్తున్నారని పార్టీ నేతలు చెప్తున్నారు.
కాగా, బుధవారం రాత్రి సీఈసీ మీటింగ్ జరగనున్న నేపథ్యంలో.. దీపాదాస్ మున్షీ మీటింగ్ పూర్తి కాగానే నేతల అభిప్రాయాలను ఏఐసీసీకి పంపనున్నట్లు తెలుస్తోంది. రాష్ట్రంలో మొత్తం 17 ఎంపీ సీట్లు ఉండగా.. నల్గొండ, మహబూబ్నగర్, మహబూబాబాద్, జహీరాబాద్ అభ్యర్థులను ఈనెల 8న ఏఐసీసీ ప్రకటించింది. మొదటి నుంచీ కాంగ్రెస్ లో ఉన్న వారి పేర్లనే ప్రకటించి.. ఇతర పార్టీల నుంచి వచ్చిన వారి పేర్లను పక్కన పెట్టింది. మొదటి లిస్ట్లో ఇతర పార్టీల నుంచి వచ్చిన వారి పేర్లను ప్రకటిస్తే విమర్శలు వస్తాయని నలుగురి పేర్లను మాత్రమే ప్రకటించింది.
