- చేగుంట మండలం మక్కరాజుపేట వద్ద రాస్తారోకో
మెదక్/చేగుంట, వెలుగు : కరెంట్ కోతలను నిరసిస్తూ మెదక్ జిల్లా చేగుంట మండలం మక్కరాజుపేట వద్ద గజ్వేల్ ప్రధాన రహదారిపై బుధవారం రైతులు ఆందోళన చేపట్టారు. రోడ్డుకు అడ్డంగా బైక్ లు, ట్రాక్టర్ పెట్టి రాస్తారోకో చేశారు.
ఈ సందర్భంగా వారు మాట్లాడుతూ కరెంట్కోతతో పంటలు ఎండిపోతున్నాయని, లోవోల్టేజీ వల్ల బోరు మోటార్లు, ట్రాన్స్‌‌‌‌‌‌‌‌ఫార్మర్లు కాలిపోతున్నాయని ఆవేదన వ్యక్తం చేశారు. విద్యుత్ శాఖ అధికారులు 12 గంటల పాటు విద్యుత్ సరఫరా చేస్తున్నామని చెప్తున్నప్పటికీ, కనీసం 8 గంటలు కూడా త్రీఫేజ్ కరెంటు రావడం లేదని వాపోయారు.
మరో 15 రోజుల పాటు నిరంతరాయంగా విద్యుత్ సరఫరా చేస్తే పంట చేతికి వస్తుందని తెలిపారు. ప్రభుత్వం, విద్యుత్ శాఖ అధికారులు స్పందించి పంటలకు నిరంతరాయంగా నాణ్యమైన విద్యుత్ సరఫరా చేయాలని డిమాండ్ చేశారు.
