రెబల్ స్టార్ ప్రభాస్, సంచలన దర్శకుడు సందీప్ రెడ్డి వంగా కాంబినేషన్ లో వస్తున్న ప్రతిష్టాత్మక చిత్రం' స్పిరిట్' . ఈ భారీ యాక్షన్ మూవీపై బాక్సాఫీస్ వద్ద అంచనాలు భారీగానే ఉన్నాయి. ఇటీవలే హైదరాబాద్ లో ఈ హై-వోల్టేజ్ యాక్షన్ డ్రామా షూటింగ్ మొదలైంది. అయితే ఒక పక్క షూటింగ్ జరుగుతుండగానే ఈ సినిమాకు సంబంధించిన మరో ఆసక్తికరమైన అప్‌డేట్‌ఇప్పుడు అభిమానుల దృష్టిని ఆకర్షిస్తున్నాయి. సోషల్ మీడియాలో తెగ వైరల్ అవుతోంది.
ప్రభాస్ లాంగ్ బ్రేక్!
హైదరాబాద్‌లో నవంబర్ 23న 'స్పిరిట్' షూటింగ్ ఘనంగా ప్రారంభమైంది. ఈ ముహూర్త పూజకు మెగాస్టార్ చిరంజీవి ముఖ్య అతిథిగా హాజరై తొలి క్లాప్ కొట్టారు. చిత్ర బృందానికి శుభకాంక్షలు తెలిపారు. షూటింగ్ కూడా ప్రారంభమైంది. అయితే హైదరాబాద్ షెడ్యూల్‌ను పూర్తి చేసిన వెంటనే ప్రభాస్ ఒక సుదీర్ఘ విరామం తీసుకోవాలని ప్లాన్ చేస్తున్నట్లు తెలుస్తోంది. గత కొంతకాలంగా ప్రభాస్ వరుసగా పెద్ద ప్రాజెక్టులతో బిజీగా ఉన్న నేపథ్యంలో.. ఈ బ్రేక్ ఆయనకు అవసరమని సినీ వర్గాలు అంటున్నాయి. అయితే ఈ గ్యాప్‌లో దర్శకుడు సందీప్ రెడ్డి వంగా మాత్రం మిగతా నటీనటులతో షూటింగ్‌ను కొనసాగించే అవకాశం ఉంది.
'యాంగ్రీ కాప్'గా డార్లింగ్!
'స్పిరిట్' చిత్రంలో ప్రభాస్ తన కెరీర్‌లోనే మొట్టమొదటిసారిగా పవర్‌ఫుల్ పోలీస్ ఆఫీసర్ పాత్రలో కనిపించనున్నారు. వంగా మార్కు రఫ్ అండ్ రా యాక్షన్, తీవ్రమైన ఎమోషన్స్ ఈ చిత్రంలో హైలైట్‌గా ఉంటాయని సమాచారం. ఈ పాత్ర కోసం సందీప్ రెడ్డి వంగా ప్రత్యేకంగా ప్రభాస్‌ను సన్నబడాలని కోరారట. అలాగే, చిత్రంలోని చాలా యాక్షన్ సన్నివేశాలలో ప్రభాస్ స్వయంగా డూప్‌లు లేకుండా రియల్ స్టంట్స్ చేయాలని నిర్ణయించుకున్నారని టాక్ వినిపిస్తోంది. 'యానిమల్' కోసం దాదాపు ఆరు నెలలు స్క్రీన్‌ప్లే కోసం సమయం తీసుకున్న వంగా, 'స్పిరిట్' స్క్రిప్ట్ విషయంలో కూడా అంతే పట్టుదలతో ఉన్నారని సినీ వర్గాలు చెబుతున్నాయి. అంతే కాకుండా ఈ 'స్పిరిట్' చిత్రంలో రణబీర్ కపూర్ అతిథి పాత్రలో కనిపించే అవకాశం ఉందని, ఇది కథలో కీలక మలుపునకు దారితీస్తుందని కొన్ని రూమర్‌లు వినిపిస్తున్నాయి.
అసిస్టెంట్లుగా ఇద్దరు స్టార్ కిడ్స్
ఈ సినిమాకు సంబంధించిన మరో ఆసక్తికర అంశం ఏమిటంటే, టాలీవుడ్‌కు చెందిన ఇద్దరు స్టార్ కిడ్స్ పనిచేస్తున్నారు. వారిలో దర్శకుడు త్రివిక్రమ్ శ్రీనివాస్ కుమారుడు రిషి మనోజ్, హీరో రవితేజ కుమారుడు మహదన్ అసిస్టెంట్ డైరెక్టర్లుగా సందీప్ రెడ్డి వంగాకు సహాయం చేయనున్నారు. ఇది టాలీవుడ్‌లో కొత్త తరం ప్రతిభకు సూచికగా నిలుస్తోందని అభిప్రాయం వ్యక్తం అవుతోంది. ప్రభాస్‌కు జోడీగా 'యానిమల్' చిత్రంతో స్టార్ డమ్ తెచ్చుకున్న త్రిప్తి డిమ్రి నటిస్తుండగా, బాలీవుడ్ నటి కాజోల్ కూడా ఒక ముఖ్యమైన పాత్రలో నటించనుంది. ప్రముఖ నిర్మాత భూషణ్ కుమార్ ఈ చిత్రాన్ని నిర్మిస్తున్నారు. 'స్పిరిట్' చిత్రం 2027లో విడుదల కావాలని లక్ష్యంగా పెట్టుకున్నారు.
