-
కేసును సీబీఐకి అప్పగిస్తేనే వాస్తవాలు బయటపడ్తయ్: ప్రేమేందర్ రెడ్డి
హనుమకొండ, వెలుగు : గత ప్రభుత్వంలో అప్పటి సీఎం, మంత్రులు మునుగోడు ఉప ఎన్నికల్లో బీజేపీని దెబ్బతీయడానికి ఫోన్ ట్యాపింగ్కు పాల్పడి, ఫామ్ హౌస్ ఫైల్స్ పేరున డ్రామాలాడారని బీజేపీ రాష్ట్ర ప్రధాన కార్యదర్శి గుజ్జుల ప్రేమేందర్ రెడ్డి ఫైర్ అయ్యారు. ఫామ్ హౌస్ఫైల్స్ అంతా ఫేక్ అని బీజేపీ ఆనాడే చెప్పిందని, దానిపై సీబీఐ ఎంక్వైరీ చేయాల్సిందిగా హైకోర్టుకు కూడా వెళ్లిందని గుర్తుచేశారు. బీజేపీ వరంగల్ ఎంపీ అభ్యర్థి ఆరూరి రమేశ్కు మద్దతుగా బుధవారం హనుమకొండలో ఎన్నికల సన్నాహక సమావేశం నిర్వహించారు. చీఫ్ గెస్ట్‌‌గా హాజరైన గుజ్జుల ప్రేమేందర్ రెడ్డి మాట్లాడుతూ.. ఫామ్ హౌస్ ఫైల్స్ పేరుతో బీజేపీని ఎలా అప్రతిష్ట పాలు చేయాలనుకున్నారో ప్రజలకు అప్పుడే తెలిసిపోయిందన్నారు. బీఆర్ఎస్ నాయకులు ఫోన్ ట్యాపింగ్ కు పాల్పడి ప్రజల వ్యక్తిగత జీవితాలు, వ్యాపార విషయాల్లో జోక్యం చేసుకున్నారని, బ్లాక్ మెయిళ్లకు పాల్పడినట్టు వార్తలొస్తున్నాయన్నారు. ఫోన్ ట్యాపింగ్ కేవలం రాష్ట్రానికే పరిమితం కాలేదని.. కొంతమంది విదేశాల్లో ఉండి కూడా నడిపించారని ఆరోపించారు. కేటీఆర్ పుడింగి లెక్క మాట్లాడుతున్నాడని, సీబీఐతో విచారణ జరిపిస్తేనే అసలు వాస్తవాలు బయటపడతాయని ప్రేమేందర్రెడ్డి అన్నారు. కాంగ్రెస్ ప్రభుత్వానికి చిత్తశుద్ధి ఉంటే వెంటనే కేసును సీబీఐకి అప్పగించాలని డిమాండ్ చేశారు. అవినీతిపరులను లోపలేస్తామని ఎన్నికల సమయంలో హడావుడి చేసిన కాంగ్రెస్ ఇప్పుడు కాంప్రమైజ్ రాజకీయాలు చేస్తున్నదని మండిపడ్డారు.
