ముషీరాబాద్, వెలుగు: హుస్సేన్ సాగర్, ఉస్మాన్ సాగర్, హిమాయత్ సాగర్లను కాపాడుకోవాల్సిన బాధ్యత అందరిపై ఉందని పర్యావరణవేత్త, ప్రొఫెసర్ దొంతి నరసింహారెడ్డి అన్నారు. చెరువులను పరిరక్షించుకోవాలన్నారు. ప్రపంచ పర్యావరణ దినోత్సవం సందర్భంగా ఆదివారం ‘‘సేవ్ హుస్సేన్ సాగర్.. సేవ్ హైదరాబాద్” నినాదంతో ట్యాంక్ బండ్పై మానవహారం నిర్వహించారు. ఈ కార్యక్రమానికి ముఖ్య అతిథిగా నరసింహారెడ్డి హాజరై, మాట్లాడారు. హుస్సేన్ సాగర్ కాలుష్యంతో ప్రమాదకారిగా మారిందన్నారు.
ప్రభుత్వం జీవో 111 రద్దుతో జంట నగరాలకు వరద ప్రమాదం పొంచి ఉందని, దీంతో ఆ జీవోను పునరుద్ధరించాలని డిమాండ్ చేశారు. పర్యావరణవేత్త సాగర్ ధారా మాట్లాడుతూ, హుస్సేన్ సాగర్ను కాలుష్య రహితంగా మార్చాల్సిన అవసరం ఉందన్నారు. సీనియర్ జర్నలిస్ట్ పాశం యాదగిరి మాట్లాడుతూ, హైదరాబాద్ జిందాబాద్ ఆధ్వర్యంలో పర్యావరణ పరిరక్షణ కోసం సదస్సులు, సెమినార్లు నిర్వహిస్తున్నామని చెప్పారు.
