శంషాబాద్/మెహిదీపట్నం/ఓయూ/వెలుగు: రాష్ట్రంలో బీజేపీ ఎదుగుదలను చూసి ఓర్వలేకనే నిజామాబాద్ ఎంపీ అర్వింద్ ధర్మపురి ఇంటిపై టీఆర్ఎస్ నేతలు, జాగృతి గూండాలు దాడి చేశారని మైలార్ దేవ్ పల్లి కార్పొరేటర్ తోకల శ్రీనివాస్ రెడ్డి విమర్శించారు. దాడికి నిరసనగా ఆరాంఘర్ చౌరస్తా వద్ద శ్రీనివాస్రెడ్డి ఆధ్వర్యంలో నాయకులు నిరసన తెలిపారు. అలాగే అర్వింద్ ఇంటిపై దాడిని ఖండిస్తూ బీజేపీ రాష్ట్ర కార్యదర్శి ఉమారాణి, గోల్కొండ జిల్లా ఎగ్జిక్యూటివ్ మెంబర్ అల్వాల ఇంద్రసేనారెడ్డి, ఎస్సీ మోర్చా కార్వాన్ ఇన్చార్జ్పూర్ణచంద్రరావు లంగర్ హౌస్ పీఎస్‌‌లో ఫిర్యాదు చేశారు.
ఈ సందర్భంగా వారు మాట్లాడుతూ టీఆర్ఎస్ లీడర్ల దాడులను ప్రజలు గమనిస్తున్నారని, వచ్చే ఎన్నికల్లో తగిన బుద్ధి చెబుతారని అన్నారు. దాడులకు బీజేపీ కార్యకర్తలు భయపడరని చెప్పారు. ఓయూ ఎస్సీ, ఎస్టీ, బీసీ విద్యార్థి నాయకులు ఓయూ ఎన్ సీసీ గేట్వద్ద ఎమ్మెల్సీ కవిత దిష్టిబొమ్మను దహనం చేశారు. జేఏసీ లీడర్సురేశ్ యాదవ్ మాట్లాడుతూ.. దొర అహంకారంతో రాష్ట్రంలోని ఎస్సీ, ఎస్టీ, బీసీలపై దాడులు చేయిస్తున్నారని మండిపడ్డారు. కవిత అధికారాన్ని అడ్డుపెట్టుకుని ఎంపీ అర్వింద్ఇంటిపై దాడి చేయించిందని ఆరోపించారు. బేషరతుగా అర్వింద్కు కవిత క్షమాపణ చెప్పాలని డిమాండ్ చేశారు.
