గుజరాత్ : ‘‘నాకు పబ్జీ ఆడుతుంటే అందులో ఒకరితో పరిచయమైంది. లవ్ చేస్తున్నా. నాకు నా భర్తతో విడాకులిప్పిస్తే అతడినే పెళ్లి చేసుకుంటా” అని మహిళా హెల్ప్లైన్ నంబర్కు ఫోన్ చేసిందో 19 ఏళ్ల అమ్మాయి. పబ్జీ వ్యసనం జనాన్ని ఎంతలా పట్టిపీడిస్తోందో చెప్పేందుకు మరో ఉదాహరణ ఇది. ఈ ఘటన అహ్మదాబాద్లో జరిగింది. ఆ అమ్మాయి రోజూ పబ్జీ ఆడుతూ ఆ అబ్బాయికి చేరువైంది. ఇద్దరూ కలిసి పబ్జీ ఆడేవాళ్లు. అది కాస్తా సాన్నిహిత్యాన్ని పెంచడంతో అతడితోనే కలిసి బతకాలనుకుంది. వెంటనే గుజరాత్లో పెట్టిన ‘అభయం 181’కు ఫోన్ కలిపింది. భర్తతో విడాకులిప్పించాలని కోరింది. దీంతో అభయం టీం ఓ కౌన్సిలింగ్ టీంను ఏర్పాటు చేసింది. ఆ టీం ఆమె ఇంటికి వెళ్లింది.
కుటుంబ సభ్యులతో మాట్లాడింది. ఎప్పుడూ ఫోన్ పట్టుకుని పబ్జీ ఆడుతూనే ఉంటుందని కుటుంబ సభ్యులు కౌన్సిలింగ్ టీంకు చెప్పారు. వద్దని చెబితే గొడవ పెట్టుకునేదని వాపోయారు. నిర్ణయంపై మరొక్కసారి ఆలోచించుకోవాలని ఆమెకు ఇన్చార్జ్ కౌన్సిలర్ సోనాల్ సంగథియా చెప్పారు. అప్పటివరకు పునరావాస కేంద్రానికి తీసుకెళతామని చెబితే అందుకు ఆమె నిరాకరించింది. అక్కడ ఫోన్ ఇవ్వరు కాబట్టి రానని తెగేసి చెప్పింది. దీంతో ఆమెను కౌన్సిలర్లు బలవంత పెట్టలేదు. ఆమెకున్న ఆప్షన్లను మాత్రం వివరించారు. ఆలోచించుకోవడానికి కొంత టైం కావాలని, ఏదైనా సాయం కావాల్సి వస్తే మళ్లీ ఫోన్ చేస్తానని కౌన్సిలర్కు ఆమె చెప్పింది.