న్యూఢిల్లీ: భారత్ జోడో యాత్రకు కొద్దిరోజులు బ్రేక్ ఇచ్చిన కాంగ్రెస్ నేత రాహుల్ గాంధీ సోమవారం ఢిల్లీలోని మహాత్మా గాంధీ స్మారకంతో పాటు, పలువురు మాజీ ప్రధానుల స్మృతివనాలను సందర్శించారు. ఉదయాన్నే గాంధీ స్మారకం రాజ్ఘాట్, మాజీ ప్రధాని లాల్ బహదూర్ శాస్త్రి స్మారకం విజయ్ఘాట్ను సందర్శించి నివాళి అర్పించారు. ఆపై మాజీ ప్రధానులు జవహర్లాల్ నెహ్రూ, ఇందిరాగాంధీ, రాజీవ్గాంధీల స్మారక చిహ్నాలైన శాంతి వనం, శక్తి స్థల్, వీర్భూమి వద్ద నివాళి అర్పించారు. అలాగే సదైవ్ అటల్ వద్దకు చేరుకుని మాజీ పీఎం అటల్ బిహారీ వాజ్పేయికి కూడా రాహుల్ పూలు చల్లి నివాళులర్పించారు. మొదట జోడో యాత్ర ఢిల్లీకి చేరుకోగానే మాజీ ప్రధానులకు శనివారమే నివాళులర్పించాలని ఆయన అనుకున్నప్పటికీ.. సోమవారం ఉదయానికి మార్చారు.
నిజాయితీ ముందు అవినీతి మోకరిల్లుతోంది: బీజేపీ
ఓ పక్క కాంగ్రెస్ నేతలు వాజ్పేయిపై అసభ్యకరంగా ఆరోపణలు చేస్తరు.. మరోవైపు రాహుల్ అటల్ ఘాట్ వద్ద నివాళి అర్పిస్తరు.. ఇదంతా రాహుల్ ఆడుతున్న డ్రామా అని బీజేపీ ఫైర్ అయింది. నిజాయితీకి, దేశం పట్ల అంకితభావానికి వాజ్పేయి ప్రతిరూపమని, అలాంటి నిజాయితీ ముందు అవినీతి(రాహుల్) మోకరిల్లుతోందని బీజేపీ అధికార ప్రతినిధి గౌరవ్ భాటియా అన్నారు. ‘‘వాజ్పేయి నిజాయితీకి ప్రతిరూపం. శాంతి దూత. రాహుల్ గాంధీ విద్వేషాన్ని వ్యాప్తి చేయడంలో, దేశం పరువు తీయడంలో కూరుకుపోయి ఉన్నోడు”అని భాటియా కామెంట్ చేశారు.
వాజ్పేయిని బ్రిటిష్ కోవర్టు అని ఆరోపిస్తూ ఆదివారం నాడు కాంగ్రెస్ లీడర్ గౌరవ్ పాండి చేసిన ట్వీట్పై బీజేపీ మరో అధికార ప్రతినిధి షెహజాద్ పూనావాలా మండిపడ్డారు. ‘‘పాండి చేసిన ట్వీట్ను తొలగించారు కానీ, అది సరిపోదు. ఆయనను మీ పార్టీ నుంచి తప్పించాలి. కాంగ్రెస్ తన స్టాండ్ను స్పష్టం చేసి క్షమాపణ చెప్పాలి. లేదంటే పాండి చేసిన ఆరోపణలు రాహుల్ గాంధీ మాటలని నమ్మే పరిస్థితి వస్తుంది”అని పూనావాలా పేర్కొన్నారు. బీజేపీ నేతల ట్వీట్లపై కాంగ్రెస్ స్పందించింది. పాండి చేసిన ట్వీట్ను తొలగించారని, రాహుల్గాంధీ వైఖరి, కాంగ్రెస్ స్టాండ్ ఒకటేనని పేర్కొంది.
