మన దేశంలో నిరుద్యోగం అంతకంతకూ పెరిగిపోతోంది. లక్షల్లో ఉద్యోగాలు.. కోట్లల్లో నిరుద్యోగులు అనేంత దారుణంగా పరిస్థితి తయారైంది. ప్రభుత్వ ఉద్యోగాలకు అప్లై చేసుకున్న అభ్యర్థుల సంఖ్యనే ఇందుకు సాక్ష్యంగా నిలిచింది. తాజాగా.. రైల్వే రిక్రూట్మెంట్ బోర్డ్.. అదేనండీ ఆర్ఆర్బీ.. రైల్వేలో గ్రూప్-డీ పోస్టుల భర్తీకి నోటిఫికేషన్ రిలీజ్ చేసింది.
RRB ఉద్యోగాలకు కాంపిటీషన్ ఉంటుందని తెలుసు గానీ మరీ ఈ స్థాయిలో ఉండటం మాత్రం సాధారణ విషయం కాదు. దేశవ్యాప్తంగా రైల్వేలో గ్రూప్-డీ ఉద్యోగాల కోసం కోటీ 8 లక్షల మంది అప్లై చేసుకున్నారు. 32 వేల 438 రైల్వే గ్రూప్-డీ పోస్టులకు గానూ ఆర్ఆర్బీకి అందిన దరఖాస్తుల సంఖ్య కోటి పైనే ఉందంటే నిరుద్యోగం ఏ స్థాయిలో పెరిగిపోయిందో అర్థం చేసుకోవచ్చు.
తెలుగు రాష్ట్రాల నుంచి కూడా రైల్వే గ్రూప్-డీ పోస్టులకు భారీగానే అప్లై చేశారు. సికింద్రాబాద్ ఆర్ఆర్బీకి 9 లక్షల 60 వేల 697 దరఖాస్తులు అందాయి. ముంబై ఆర్ఆర్బీకి దేశంలోనే అత్యధికంగా 15 లక్షల 59 వేల 100 అప్లికేషన్లు అందడం గమనార్హం. బెంగళూరు ఆర్ఆర్బీకి 2 లక్షల 75 వేల 307 దరఖాస్తులు అందాయి.
ఇలా.. మొత్తంగా దేశంలోని ఆర్ఆర్బీ రీజినల్ కార్యాలయాలకు రైల్వే గ్రూప్-డీ పోస్టులకు కోటీ 8 లక్షల 22వేల 423 అప్లికేషన్లు వచ్చాయి. తిప్పి కొడితే 35 వేలు కూడా లేని పోస్టులకు కోటి మంది అప్లై చేశారంటే మన దేశంలో నిరుద్యోగం విలయ తాండవం చేస్తుందనడానికి ఇంతకు మించిన నిదర్శనం అక్కర్లేదేమో.
