బాలీవుడ్ స్టార్ హీరో రణ్‌వీర్‌సింగ్ మరోసారి వార్తల్లోకెక్కారు. ఇటీవల గోవాలో జరిగిన ఇంటర్నేషనల్ ఫిల్మ్ ఫెస్టివల్ ఆఫ్ ఇండియా ( IFFI 2025 ) ముగింపు వేడుకలో ఆయన చేసిన వ్యాఖ్యలు ఇప్పుడు తీవ్ర చర్చనీయాంశంగా మారాయి. కన్నడ బ్లాక్ బ్లాస్టర్ మూవీ 'కాంతార 2' బాక్సాఫీస్ వద్ద సృష్టించిన రికార్డులు తెలిసిందే. ఈ వేదికపై ఈ మూవీని ప్రశంసిస్తూ చేసిన వ్యాఖ్యలు ఇప్పుడు రణ్వీర్ కు చిక్కులు తెచ్చిపెట్టాయి. కన్నడిగుల నుంచి ఆగ్రహం వ్యక్తం అవుతోంది.
'కాంతార 2' పై ప్రశంసలు
ఈ వేదికపై రణ్వీర్ సింగ్ తన రాబోయే చిత్రం 'ధూరందర్' గురించి మాట్లాడటంతో పాటు, ఇటీవల విడుదలైన రిషబ్ శెట్టి సినిమా 'కాంతార 2' గురించి ప్రత్యేకంగా ప్రస్తావించారు. 'కాంతార' తొలి భాగం 2022లో సంచలనం సృష్టించిన విషయం తెలిసిందే. ఆ సీక్వెల్‌గా వచ్చిన 'కాంతార 2' కూడా ప్రపంచవ్యాప్తంగా రూ. 800 కోట్లకు పైగా వసూళ్లు రాబట్టి బాక్సాఫీస్ వద్ద రికార్డులు సృష్టించింది. ఈ సందర్భంగా రిషబ్ శెట్టి నటనను ప్రశంసించారు రణ్వీర్ సింగ్ . ఆ ప్రదర్శన అద్భుతంగా ఉంది, ముఖ్యంగా ఒక దెయ్యం మీ శరీరంలోకి ప్రవేశించినప్పుడు. ఆ ఒక్క నటన... అంటూ రిషబ్ నటనలోని తీవ్రతను, అద్భుతమైన క్లైమాక్స్ సన్నివేశాన్ని కొనియాడారు.
స్టేజీపై అనుకరణ - అపార్థానికి దారి..
అయితే, ప్రశంసల మధ్యే రణ్వీర్ సింగ్ వేదికపై ఆ సినిమాలోని క్లైమాక్స్ సన్నివేశాన్ని కొన్ని క్షణాలు అనుకరించడానికి ప్రయత్నించారు. ఈ దృశ్యాలు ఆన్‌లైన్‌లో వైరల్ అవ్వడంతో రణ్వీర్ సింగ్ తీవ్ర విమర్శల పాలయ్యారు. 'కాంతార' క్లైమాక్స్ సన్నివేశానికి సాంస్కృతిక, మతపరమైన ప్రాధాన్యత ఉంది. అందులో రిషబ్ శెట్టి పోషించింది కేవలం 'దెయ్యం' పాత్ర కాదు, అది దైవ నర్తనం (దైవ కోలం) ద్వారా దైవత్వాన్ని ఆవాహన చేసే సన్నివేశం. దీనిని రణ్వీర్ ' దెయ్యం' అని పేర్కొనడం, ఆ తరువాత దానిని వేదికపై సరదాగా అనుకరించడం చాలా మందికి అగౌరవంగా అనిపించింది.
కన్నడిగులు ఫైర్..
ఈ వీడియో క్లిప్‌లు సోషల్ మీడియాలో వైరల్ అవుతోంది. నెటిజన్లు రణ్‌వీర్‌పై విమర్శల వర్షం కురిపించారు. ఒక నెటిజన్ స్పందిస్తూ, "రణ్వీర్ సింగ్ కాంతార సన్నివేశానికి స్పందించిన తీరు అనవసరంగా, అగౌరవంగా అనిపించింది" అని వ్యాఖ్యానించారు. మరొకరు ముఖంపై చేయి వేసుకున్న ఎమోజీలతో తమ నిరసనను వ్యక్తం చేస్తూ, రణ్‌వీర్‌కు "ఆ 'దెయ్యం' చావుండి దేవత (Chavundi is Goddess) తప్ప దెయ్యం కాదు" అని తెలియజేశారు. ఈ సినిమా కన్నడ ప్రాంతీయ సంస్కృతికి , దైవారాధన ఆచారాలకు సంబంధించినదని, దీనిపై సరైన అవగాహన లేకుండా ఆయన అలా మాట్లాడటం తగదని కన్నడిగులు ఫైర్ అవుతున్నారు.
అభిమానుల సమర్థన
మరోవైపు, రణ్వీర్ అభిమానులు ఆయనకు మద్దతుగా నిలిచారు. మీరు రణ్‌వీర్‌ను నిందిస్తుంటే, నవ్వుతున్న ఇతరులను కూడా నిందించండి అని ఒక అభిమాని పేర్కొన్నారు. మరొక అభిమాని మాట్లాడుతూ,.. రిషబ్ శెట్టి కూడా నవ్వుతున్నారు. ప్రతి విషయాన్ని వివాదాస్పదం చేయకండి. ఆయన కేవలం నటనను ప్రశంసించారు అని వివరణ ఇచ్చారు. అయితే, ఈ సంఘటన బాలీవుడ్, దక్షిణాది చిత్ర పరిశ్రమల మధ్య సాంస్కృతిక అవగాహన లోపానికి అద్దం పడుతోందని కొందరు విశ్లేషకులు అభిప్రాయపడుతున్నారు. రణ్వీర్ సింగ్ తన వ్యాఖ్యలపై ఎలా స్పందిస్తారో చూడాలి...
Ranveer's reaction to the Kantara scene really felt unnecessary and disrespectful pic.twitter.com/yQeffCofZk
— Nandan (@nandan_333) November 29, 2025
