నేషనల్ క్రష్ రష్మిక మందన్న , దీక్షిత్ శెట్టి కలిసి నటించిన చిత్రం 'ది గర్ల్‌ఫ్రెండ్‌'. నటుడు రాహుల్ రవీంద్రన్ దర్శకత్వంలో తెరకెక్కిన ఈ మూవీ విభిన్నమైన ప్రేమకథగా ప్రశంసలు అందుకుంది. నవంబర్‌ 7న థియేటర్లలోకి వచ్చిన ఈమూవీ ప్రేక్షకులను ఆకట్టుకున్నా.. బాక్సాఫీస్ వద్ద అశించిన స్థాయిలో వసూళ్లు రాబట్టలేకపోయింది. ఈ రొమాంటిక్ డ్రామా చిత్రం థియేటర్లలోకి వచ్చి నెలరోజులు కాకముందే ఇప్పుడు ఓటీటీ లోకి వచ్చేందుకు రెడీ అవుతోంది.
స్ట్రీమింగ్ ఎక్కడంటే?
రొమాంటిక్ డ్రామాగా రూపొందిన ఈ చిత్రం డిసెంబర్‌ 5 నుంచి ప్రముఖ ఓటీటీ ప్లాట్‌ఫామ్‌ నెట్‌ఫ్లిక్స్ వేదికగా స్ట్రీమింగ్ కానుంది. కేవలం తెలుగులోనే కాకుండా, హిందీ, తమిళ్‌, కన్నడ, మలయాళ భాషల్లోనూ ఇది అందుబాటులోకి రానుంది. సినిమా విడుదలైన నెలరోజులు కాకముందే ఓటీటీలో రాబోతుండటంతో అభిమానులు ఆనందం వ్యక్తం చేస్తున్నారు.
కథాంశం
ఈ చిత్రం భూమా దేవి (రష్మిక మందన్న), విక్రమ్ (దీక్షిత్ శెట్టి) అనే పీజీ విద్యార్థుల ప్రేమ ప్రయాణం చుట్టూ తిరుగుతుంది. కాలేజీలో తొలి పరిచయంలోనే ఒకరినొకరు ఇష్టపడి ప్రేమికులుగా మారతారు. భూమాని తల్లిలా చూసుకునే అమ్మాయిగా విక్రమ్ భావించడం వారి బంధాన్ని మరింత బలపరుస్తుంది.
అయితే, ఈ సున్నితమైన ప్రేమ ప్రయాణం క్రమంగా ఒక సంఘర్షణకు దారితీస్తుంది. విక్రమ్ పాత్రలో కనిపించిన దీక్షిత్ శెట్టి ఒక నియంత్రణ ధోరణి కలిగిన యువకుడిగా ఆకట్టుకున్నాడు. వీరిద్దరి మధ్య ప్రేమ బంధం మరింత లోతుగా తెలుసుకున్నప్పుడు, భూమా స్వీయ-అన్వేషణ చేసి, ఈ ప్రయాణానికి ఒక విరామం కోరాల్సి వస్తుంది. ఒక స్త్రీ తన ప్రేమ, ఆత్మాభిమానం మధ్య చిక్కుకున్నప్పుడు ఎలాంటి పోరాటం చేయాల్సి వచ్చిందనేది ఈ సినిమా కథాంశం. ఈ సినిమాలో అను ఇమ్మానుయేల్‌ (దుర్గ), రావు రమేష్ (భూమా తండ్రి), రోహిణి ముఖ్య పాత్రలు పోషించారు.
నవంబర్‌ 7న విడుదలైన ఈ సినిమా విమర్శకుల ప్రశంసలు అందుకున్నప్పటికీ, బాక్సాఫీస్ వద్ద మిశ్రమ ఫలితాలను చవిచూసింది. సినీ వర్గాల అంచనా ప్రకారం ఈ చిత్రం సుమారు రూ.28 కోట్లకు పైగా గ్రాస్ కలెక్షన్‌ను సాధించింది. యూత్‌‌‌‌‌‌‌‌ఫుల్‌ రొమాంటిక్‌‌‌‌‌‌‌లవ్‌‌‌‌‌‌‌‌స్టోరీని రాహుల్ రవీంద్రన్ దర్శకత్వంలో గీతా ఆర్ట్స్ సంస్థ సమర్పణలో ఈ సినిమాను ధీరజ్ మొగిలినేని, విద్య కొప్పినీడి నిర్మించారు . హేషమ్ అబ్దుల్ వాహబ్ సంగీతం అందించాడు. ఈ మూవీలో రష్మిక మందన్న నటనకు ప్రశంసలు దక్కాయి. తక్కువ సమయంలోనే ఓటీటీలోకి వస్తున్న ఈ భావోద్వేగ డ్రామాను ఎప్పుడెప్పుడు చూద్దామా అని సినీ అభిమానులు ఎదురుచూస్తున్నారు.
