న్యూఢిల్లీ: సహారా ఇండియా లైఫ్ ఇన్సూరెన్స్ కంపెనీకి చెందిన రెండు లక్షల పాలసీలతో పాటు పాలసీహోల్డర్ల ఆస్తులనూ స్వాధీనం చేసుకోవాలని ఇన్సూరెన్స్ రెగ్యులేటర్ ఐఆర్డీఏ ఎస్బీఐ లైఫ్ను ఆదేశించింది. సహారా ఆర్థిక పరిస్థితి నానాటికీ దిగజారుతుండటంతో ఈ నిర్ణయం తీసుకుంది. దీని ఫైనాన్షియల్స్ పటిష్టంగా ఉన్నందున సహారా పాలసీలను ఎస్బీఐ లైఫ్కు అప్పగించింది. ఈ ఆదేశాలను గడువులోపు అమలయ్యేలా చూసేందుకు ప్రత్యేకంగా కమిటీని కూడా నియమించింది.
సహారా పాలసీ హోల్డర్ల సమస్యలను పరిష్కరించడానికి ప్రత్యేకంగా సెల్ను ఏర్పాటు చేయాలని ఎస్బీఐ లైఫ్కు సూచించింది. లైఫ్ఇన్సూరెన్స్ బిజినెస్ కోసం సహారాకు 2004లో లైసెన్స్ మంజూరయింది. ఈ కంపెనీ ఆర్థికంగా బలహీనపడటం, పాలనాపరమైన లోపాలు ఉండటంతో వ్యాపారాన్ని నడిపించడానికి ఐఆర్డీఏ 2017లో ప్రత్యేకంగా అడ్మినిస్ట్రేటర్ను నియమించింది. కొత్త పాలసీలు ఇవ్వకుండా సహారాపై నిషేధం విధించింది. చట్టపరంగా నడచుకునేందుకు అనేకసార్లు గడువు ఇచ్చినా సహారా విఫలమైంది.
