గజ్వేల్, వెలుగు: భూమి ఫౌతీ(అనువంశిక పట్టామార్పిడి) కోసం రిపోర్టు ఇవ్వడానికి రూ.50 వేలు లంచం తీసుకుంటూ ఓ రెవెన్యూ ఇన్స్పెక్టర్ ఏసీబీకి చిక్కాడు. ఏసీబీ డీఎస్పీ ఆనంద్కుమార్ కథనం ప్రకారం..ములుగు మండలం బండనర్సంపల్లి గ్రామానికి చెందిన అవుసుల ఆంజనేయులు చనిపోయిన తర్వాత అతడి పేరిట ఉన్న 1.14 ఎకరాల భూమిని తన పేరిట మార్చాలని ఆయన బిడ్డ గిరిజారాణి సిద్దిపేట జిల్లా ములుగు తహసీల్దార్ప్రవీణ్కు దరఖాస్తు పెట్టుకుంది.
అయితే విచారణ జరిపి రిపోర్టు ఇవ్వాలని రెవెన్యూ ఇన్స్పెక్టర్(ఆర్ఐ) మహ్మద్ జావేద్పాషాను తహసీల్దార్ ఆదేశించారు. ఈ మేరకు రిపోర్టు ఇవ్వడానికి రూ.లక్ష లంచం ఇవ్వాలని జావేద్పాషా డిమాండ్ చేశాడు. దీంతో బాధితురాలు గిరిజారాణి ఏసీబీని ఆశ్రయించింది.
వారి సూచనల మేరకు గురువారం గౌరారం సమీపంలోని ఓ ప్రైవేట్ రెస్టారెంట్లో ఆర్ఐకి రూ.50వేలు ఇస్తుండగా ఏసీబీ డీఎస్పీ ఆనంద్కుమార్ ఆధ్వర్యంలో రైడ్చేసి రెడ్హ్యాండెడ్గా పట్టుకున్నారు. తర్వాత తహసీల్దార్ ఆఫీసులో విచారణ జరిపి కేసు నమోదు చేశారు. లంచం తీసుకుంటూ దొరికిన ఆర్ఐని రిమాండ్కు తరలించినట్టు ఏసీబీ అధికారులు తెలిపారు. సీఐ రమేశ్, ఎస్సై వెంకట్ రాజు గౌడ్ పాల్గొన్నారు.
