- ఫేజ్ 1లో 48 ప్లాట్లకురూ.121 కోట్లు
- ఫేజ్ 2లో 298 ప్లాట్లు సేల్.. రూ.594 కోట్ల రెవెన్యూ
- అత్యధికంగా గజం ధరరూ.1.05 లక్షలు
- కొన్నోళ్ల పేర్లు వెల్లడించని హెచ్ఎండీఏ
హైదరాబాద్, వెలుగు: రంగారెడ్డి జిల్లా శంకర్ పల్లి మండలం మోకిల ఫేజ్ 2లో ప్లాట్ల వేలం ముగిసింది. ఐదు రోజుల పాటు నిర్వహించిన వేలంలో 300 ప్లాట్లలో 298 ప్లాట్లు అమ్ముడుపోయాయి. ఈ వేలం ద్వారా ప్రభుత్వానికి రూ.594.99 కోట్ల ఆదాయం వచ్చింది. ఈ నెల 7న మోకిలా ఫేజ్ 1లో 50 ప్లాట్లను వేలం వేశారు. 48 ప్లాట్లు అమ్ముడుపోగా, రూ.121.40 కోట్ల ఆదాయం వచ్చింది. రెండు ఫేజ్లలో కలిపి రూ.716.39 కోట్లు సర్కార్ ఖజానాలో వచ్చి చేరాయి. ఫస్ట్ ఫేజ్ లో అత్యధికంగా గజం రూ.1,05,000 పలకగా, రెండో ఫేజ్ లో అత్యధికంగా గజం రూ.1లక్ష వరకు పలికింది.
ఫేజ్ 2లో తప్పిన అధికారుల రెవెన్యూ అంచనా
మోకిల ఫేజ్ 2లో మొత్తం 300 ప్లాట్లను హెచ్ఎండీఏ ఆన్ లైన్ లో వేలం వేసింది. ఈ ప్లాట్ల అమ్మకం ద్వారా మొత్తం రూ.850 కోట్ల రెవెన్యూ వస్తుందని అధికారులు అంచనా వేశారు. కానీ, ఆ మేర ఆదాయం రాలేదు. 2 ప్లాట్లు మినహా మిగిలిన 298 ప్లాట్లకు భారీగానే ధర పలికినప్పటికీ రూ.594.99 కోట్లు మాత్రమే వచ్చాయి. రెండు ఫేజ్ల వేలంలో రెండు ప్లాట్లకు మాత్రమే గజం ధర లక్ష వరకు పలికింది. ఇక మిగిలిన ప్లాట్లకు గజం కనిష్టంగా రూ.49వేలు పలకగా.. యావరేజ్గా రూ.63,216 ధర వచ్చింది. అయితే, ఆన్ లైన్ వేలంలో ప్రభుత్వ పెద్దల సూచన మేరకు కొంత మంది ఇతర బిడ్డర్లు కొనకుండా భారీగా ధర కోట్ చేశారనే చర్చ జరుగుతున్నది. ఇటీవల ఓ రోజు వేలంలో గజం రూ.25వేల నుంచి ఒకేసారి రూ.75వేలకు కోట్ చేయడంతో మిగిలిన బిడ్డర్లు వెనక్కి తగ్గారని, ఇదంతా ప్రీ ప్లాన్ అని అధికారులు ఆఫ్ ది రికార్డ్ గా చెబుతున్నారు.
విమర్శల కారణంగానే పేర్లు సీక్రెట్
మోకిల ఫేజ్ 2లో 5 రోజుల పాటు నిర్వహించిన వేలంలో 298 ప్లాట్లను కొనుగోలు చేసిన వ్యక్తుల, కంపెనీల వివరాలను మాత్రం హెచ్ఎండీఏ సీక్రెట్ గా ఉంచింది. వారి పేర్లు వెల్లడించొద్దని ప్రభుత్వ పెద్దలు ఆదేశించడంతో ఈ వివరాలు రహస్యంగా ఉంచామని హెచ్ఎండీఏ అధికారులు చెప్తున్నారు. ఆ మధ్య కోకాపేటలో అధికార పార్టీ ఎమ్మెల్సీకి చెందిన కంపెనీ ఎకరం రూ.100 కోట్లకు కొనుగోలు చేసింది. ఆ వేలంలో ప్లాట్లు కొన్న కంపెనీలు, వ్యక్తుల వివరాలు బయట పెట్టడంతో ప్రతిపక్షాలు తీవ్ర విమర్శలు గుప్పించాయి. అధికార పార్టీ నేతలు, వారి బినామీలే ఈ ప్లాట్లు కొన్నారని ఆరోపణలు చేయడంతో అప్పటి నుంచి ప్లాట్ల వేలం వేస్తున్నా కొనుగోలు చేసిన వారి వివరాలను హెచ్ఎండీఏ బయటకు వెల్లడించడం లేదు. ఇటీవల బుద్వేల్ లో 100 ఎకరాలకు వేలం నిర్వహించిన టైమ్లో కూడా వివరాలు బయటపెట్టలేదు.
