కోల్బెల్ట్/నస్పూర్, వెలుగు: శ్రీరాంపూర్ఏరియా ఆర్కే-5 అండర్ గ్రౌండ్ బొగ్గు గని నిర్దేశిత ఉత్పత్తిని లక్ష్యాన్ని 11 రోజులు ముందుగా చేరుకుంది. 2023–-24 ఆర్థిక సంవత్సరం ఆర్కే-5 గనికి 2.70 లక్షల టన్నుల బొగ్గు ఉత్పత్తి టార్గెట్గా నిర్ణయించారు. గనిలో 1300 మంది కార్మికులు పనిచేస్తూ రోజుకు 726 టన్నుల ఉత్పత్తి సాధించారు. శ్రీరాంపూర్ఏరియా సింగరేణి జీఎం బి.సంజీవరెడ్డి పర్యవేక్షణలో ఏజెంట్ ఏవీ రెడ్డి నేతృత్వంలో గని మేనేజర్అబ్దుల్ ఖదీర్, అధికారులు, ఉద్యోగులు సమష్టిగా కృషి చేసి మరో 10రోజులు మిగిలుండగానే 100 శాతానికి చేరుకున్నారు. గడిచిన మూడేండ్లుగా బొగ్గు ఉత్పత్తిలో వందశాతం సాధిస్తూ ఇతర గనులకు ఆర్కే5 అండర్ గ్రౌండ్ మైన్ ఆదర్శంగా నిలుస్తోంది. గని పనిస్థలాల్లో తక్కువ మందం థిన్సీములు(బొగ్గు ప్రాంతం) ఉండి, ప్రతికూల పరిస్థితులు ఉన్నప్పటికీ రక్షణతో కూడిన ఉత్పత్తి సాధించారు. ఈ సందర్భంగా గని మేనేజర్ఖదీర్, ఆఫీసర్లు, ఉద్యోగులు, కార్మికులు, సూపర్వైజర్లను జీఎం సంజీవరెడ్డి, ఏజెంట్ఏవీ రెడ్డి అభినందించారు.
