రోబో సినిమాలో ఒక ప్రెగ్నెంట్ లేడీకి చిట్టి రోబో పురుడు పోసే సీన్ అందరూ చూసే ఉంటారు. అలాంటివి ఒకప్పుడు ఫిక్షన్ సినిమాల్లోనే సాధ్యమయ్యేవి. కానీ.. ఇకనుంచి నిజ జీవితంలో కూడా చూడొచ్చు. వైద్య రంగంలో ఏఐ పాత్ర రోజురోజుకూ పెరిగిపోతోంది. ఎన్నో రకాల ట్రీట్మెంట్లలో ఏఐని వాడుతున్నారు. ఇప్పుడు సంప్రదాయ వైద్య విధానాలకు స్వస్తి పలికి పూర్తిగా ఏఐ టెక్నాలజీతోనే నడిచే ప్రపంచంలో మొదటి హాస్పిటల్ అందుబాటులోకి వచ్చింది.
చైనాలో ఏజెంట్ పేరుతో ప్రారంభించిన ఈ హాస్పిటల్లో చాట్‌‌‌‌జీపీటీ 3.5 టెక్నాలజీని ఉపయోగించుకుని రోబోలే ట్రీట్మెంట్ చేస్తాయి. ఇందులో కొన్ని ఎమర్జెన్సీ సర్వీసులతోపాటు, పల్మనాలజీ, కార్డియాలజీ సహా 21 రకాల సేవలు అందుబాటులో ఉన్నాయి. ఏఐతో ట్రైనింగ్ ఇచ్చిన 14 రోబోలు ట్రీట్మెంట్ అందిస్తాయి.
మానవ డాక్టర్లే కాదు.. నర్సులు, రిసెప్షనిస్టులు కూడా లేరు. ప్రస్తుతం ఈ హాస్పిటల్లో రోజుకు 3,000 కంటే ఎక్కువ మందికి చికిత్స అందించేలా ప్లాన్ చేశారు. ఇందులో డాక్టర్ల కోసం గంటల తరబడి వెయిట్ చేయాల్సిన అవసరం లేదు. రోగ నిర్ధారణ విషయంలో చాలా కచ్చితత్వం ఉందని చెప్తున్నారు. మనుషులు అందించే చికిత్సల కచ్చితత్వం 82-85 శాతం ఉండగా, ఏఐ డాక్టర్లు 93 శాతం కచ్చితత్వంతో ట్రీట్మెంట్ చేయగలవని రీసెర్చర్లు చెప్తున్నారు.
