నగలు, ఆస్తి పత్రాలు కూడా..
కొనసాగుతున్న ఈడీ సోదాలు
కోల్కతా: బెంగాల్ మంత్రి పార్థా ఛటర్జీ సన్నిహితురాలు అర్పితా ముఖర్జీ ఇంట్లో ఇంకో 15 కోట్లు దొరికాయని ఈడీ అధికారులు చెప్పారు. అర్పితకు చెందిన బెల్ఘోరియా ఫ్లాట్లో బుధవారం అధికారులు సోదాలు నిర్వహించారు. ఫ్లాట్లో నోట్లకట్టలు బయటపడడంతో బ్యాంకు అధికారులను పిలిపించారు. ఐదు కౌంటింగ్ మెషిన్లతో అక్కడికి చేరుకున్న ఆఫీసర్లు.. నోట్లకట్టల లెక్కింపు మొదలుపెట్టారు. బుధవారం రాత్రి పొద్దుపోయేదాకా ఈ లెక్కింపు కొనసాగుతూనే ఉంది. దాదాపుగా 15 కోట్లకు పైనే నగదు, 3 కిలోలకు పైగా బంగారు నగలు, వెండి నాణాలు దొరికినట్లు ఈడీ అధికారులు చెప్పారు. అర్పితా ముఖర్జీకి చెందిన టాలిగంజ్ ఫ్లాట్లో ఈడీ అధికారులు శుక్రవారం సోదాలు జరిపారు. అందులో 21.9 కోట్ల విలువైన నోట్లకట్టలు, 76 లక్షల విలువైన బంగారు నగలతో పాటు పలు ఆస్తి పత్రాలు దొరికినట్లు వెల్లడించారు. ఆ ఆస్తి పత్రాల్లోని వివరాల ఆధారంగా బెల్ఘోరియాలో అర్పితకు ఉన్న ఫ్లాట్ను గుర్తించి, బుధవారం సోదాలు జరిపినట్లు వివరించారు. దీంతోపాటు మరో రెండు ఫ్లాట్లలో సోదాలు జరుపుతున్నట్లు అనధికార సమాచారం. మనీలాండరింగ్ కేసులో మంత్రి పార్థా ఛటర్జీని, అర్పితా ముఖర్జీని ఈడీ ఇప్పటికే అరెస్టు చేసింది. ప్రస్తుతం వీళ్లిద్దరూ ఈడీ అధికారుల కస్టడీలో ఉన్నారు.
