మాస్కో: అణ్వాయుధాలను ప్రయోగిస్తామంటూ మరోసారి రష్యా బెదిరింపులకు దిగింది. తమ హైపర్సోనిక్ న్యూక్లియర్ మిసైల్శాటన్– 2తో బ్రిటన్పై దాడి చేయడానికి 200 సెకన్లు చాలంటూ రష్యా ప్రెసిడెంట్ పుతిన్ సలహాదారు ఒకరు హెచ్చరించారు. నాటోలో చేరేందుకు ఫిన్లాండ్ సన్నాహాలు చేస్తుండటం, మరోవైపు స్వీడన్ కూడా అదే దారిలో నడిచే అవకాశాలు కనిపిస్తున్నందున రష్యాకు ఫ్రస్ట్రేషన్ పెరిగిపోతోంది. ‘‘అమెరికా మమ్మల్ని రెచ్చగొడితే మంచిదే. మీ కోసం మా దగ్గర శాటన్ –2 ఉంది. రష్యా ఉనికిలో ఉండకూడదని మీరు అనుకుంటే మీకు మిగిలేది అణు బూడిదే. అమెరికాతో కలిసి ఉన్నామని ఫిన్లాండ్ చెబుతోంది. ఒకవేళ నాటోలో చేరాలని ఫిన్లాండ్ అనుకుంటే.. మా లక్ష్యం కచ్చితంగా చట్టబద్ధమైనదే అవుతుంది” అని రష్యా డిఫెన్స్ కమిటీ డిప్యూటీ చైర్మన్ అలెక్సీ జురవ్లియోవ్ అన్నారు. న్యూక్లియర్ వెపన్స్ను రష్యా సరిహద్దుల్లోకి చేరుస్తుందా? అని మీడియా ప్రశ్నించగా.. ఆ అవసరంలేదని, శాటన్–2ను సైబీరియా నుంచి ప్రయోగించవచ్చని, అదే కలినింగ్గ్రాడ్ నుంచి ప్రయోగిస్తే 200 సెకన్లలోనే మిసైల్ బ్రిటన్ను చేరుకుంటుందని చెప్పారు. ఫిన్లాండ్ బార్డర్లో తమకు వ్యూహాత్మక ఆయుధాలు లేవని, కింజల్ క్లాస్కు చెందిన వెపన్స్ అయితే 20 లేదా 10 సెకన్లలోనే ఫిన్లాండ్కు చేరుతాయని అన్నారు. తమ దేశ భద్రత విషయంలో ఎలాంటి ముప్పునైనా ఎదుర్కొనేందుకు సిద్ధంగా ఉన్నామని ఆయన చెప్పారు. రష్యా గత నెలలో ఖండాంతర క్షిపణి అయిన శాటన్–2ను పరీక్షించింది. ఈ మిసైల్ అమెరికా, యూరోప్ను టార్గెట్
చేయగలదని వెల్లడించింది.
ఖార్కివ్ నుంచి రష్యా సేనలు వెనక్కి
ఉక్రెయిన్లో రెండో అతి పెద్ద నగరమైన ఖార్కివ్ నుంచి రష్యా తన బలగాలను వెనక్కి తీసుకుందని ఉక్రెయిన్ మిలిటరీ వెల్లడించింది. అయితే ఉక్రెయిన్ తూర్పు వైపు మాత్రం యుద్ధం తీవ్ర స్థాయిలో కొనసాగుతున్నట్టు తెలిపింది. యుద్ధంలో మరో కీలక దశకు చేరుకున్నామని ఉక్రెయిన్ రక్షణ మంత్రి ఒలెక్సి రెజ్నికోవ్ చెప్పారు. చొరబాటుదారులను తరిమికొట్టేందుకు ఉక్రెయినియన్లు అన్ని ప్రయత్నాలు చేస్తున్నారని, యూరోప్, ఇతర మిత్ర దేశాలు అందించే సాయం ఆధారంగానే ఈ యుద్ధంలో ఫలితం ఆధారపడి ఉంటుందని ఉక్రెయిన్ ప్రెసిడెంట్ జెలెన్స్కీ చెప్పారు. యుద్ధం ఇంకా ఎన్ని రోజులు కొనసాగుతుందనే విషయం ఇప్పుడు ఎవరూ చెప్పలేరన్నారు.
