కీవ్: ఖార్కివ్ ప్రావిన్స్లోని డోనెట్స్క్ నదిపై ఉన్న ఇజియం నగరాన్ని రష్యా బలగాలు వీడాయి. రష్యాకు ఇది ఓ అవమానకరమైన ఓటమి అని ఉక్రెయిన్ పేర్కొంది. రైల్వే హబ్గా ఉన్న కుపియాన్స్క్ నగరాన్ని ఉక్రెయిన్ బలగాలు స్వాధీనం చేసుకుని.. సిటీ హాల్ ముందు జెండా ఎగురవేశాయని తెలియగానే.. రష్యా ఈ నిర్ణయం తీసుకుంది. నార్త్ అట్లాంటిక్ ట్రీటీ ఆర్గనైజేషన్, యూరోపియన్ యూనియన్ సహా అమెరికా, కెనడా, ఆస్ట్రేలియా, జపాన్ వంటి దేశాలు అందజేస్తున్న ఆయుధాలతో రష్యా దూకుడును ఉక్రెయిన్ అడ్డుకుంటున్నది. మార్చిలో కీవ్ను స్వాధీనం చేసుకునేందుకు కూడా రష్యా బలగాలు ప్రయత్నించి ఓడిపోయాయి. కాగా, ఇజియం నగరాన్ని విడిచి వచ్చేయాలని నిర్ణయం తీసుకోవడానికి కారణం రీ యూనిట్ కోసమేనని రష్యా రక్షణ శాఖ
ప్రకటించింది.
రష్యా ఓటమి ఖాయం: జెలెన్‌‌స్కీ
ఉక్రెయిన్‌‌లో తూర్పు ప్రాంత పట్టణాల నుంచి రష్యన్ బలగాలు క్రమంగా వెనక్కి మళ్లుతున్నాయని ఉక్రెయిన్ ప్రెసిడెంట్ జెలెన్ స్కీ చెప్పారు. 2వేల చదరపు కిలో మీటర్ల మేర తమ భూ భాగాన్ని రష్యా దళాల నుంచి తిరిగి స్వాధీనం చేసుకున్నామని, రష్యా పరాజయం ఖాయమైందని జెలెన్ స్కీ చెప్పారు.
జపరోజియా ప్లాంట్ క్లోజ్
యూరప్‌‌లోని అతిపెద్ద అణు కర్మాగారం జపరోజియాను ఎలక్ట్రిసిటీ గ్రిడ్‌‌కు తిరిగి కనెక్ట్ చేశారు. ఆపై ప్లాంట్లోని చివరి రియాక్టర్ను క్లోజ్ చేశారు. రష్యా దాడుల కారణంగా ఇంజనీర్లు ఈ నిర్ణయం తీసుకున్నారు. ఈ ప్లాంట్లో 6 న్యూక్లియర్ రియాక్టర్లు ఉండగా.. రష్యా షెల్లింగ్ కారణంగా ఇప్పటిదాకా ఒకే రియాక్టర్ను ఆపరేట్ చేస్తూ వచ్చారు.
