సర్పంచ్ అభ్యర్థుల జేబులకు చిల్లు..వార్డ్ మెంబర్లు, ప్రపోజర్ల టాక్స్ బకాయిల చెల్లింపులు

• ఒక్కక్కరిపై రూ.లక్ష దాకా భారం
• ఉసూరుమనిపిస్తున్న నామినేషన్స్ ఖర్చు
• కులం సర్టిఫికెట్స్​కు క్యూ.. సర్వర్ ప్రాబ్లంతో టెన్షన్​
• కొత్త బ్యాంక్ అకౌంట్ రూల్​తో టెన్షన్​    

నిజామాబాద్, వెలుగు :  పంచాయతీ ఎన్నికల్లో పోటీ చేసే వార్డు సభ్యుల ప్యానల్, మద్దతుదారుల ఇంటి టాక్స్ సర్పంచ్ అభ్యర్థులు భరిస్తూ బోరుమంటున్నారు. ఇంటి టాక్స్​, వాటర్ బిల్లు పూర్తిగా చెల్లించి నోడ్యూస్ సర్టిఫికెట్​తో నామినేషన్​ దాఖలు చేయాలన్న నిబంధనతో సర్పంచ్​ అభ్యర్థుల జేబులకు చిల్లులు పడుతున్నాయి. 15 వార్డులున్న పెద్ద పంచాయతీల్లో వార్డు సభ్యులు,  ప్రపోజర్ల పన్ను చెల్లించాలంటే సర్పంచ్​ అభ్యర్థులకు సుమారు రూ.50 వేల నుంచి రూ.లక్ష వరకు ఖర్చవుతోంది. 

దూరదృష్టి ప్యానల్..​

జిల్లాలో 545 గ్రామ పంచాయతీలు, 5,022 వార్డులు ఉండగా ఫస్ట్​ ఫేజ్ ఎలక్షన్ జరిగే బోధన్​ డివిజన్​లోని 11 మండలాల్లో 184 జీపీలు, 1,642 వార్డులు ఉన్నాయి. అక్కడ 27 నుంచి ప్రారంభమైన నామినేషన్లు 29కి (నేటితో) ముగియనున్నాయి. సర్పంచ్​గా గెలిచాక పంచాయతీల్లో తీసుకునే నిర్ణయాలకు వార్డు సభ్యుల తీర్మానం అవసరం ఉంటుంది. సర్పంచ్​తో కలిసి ఉప సర్పంచ్​ పోస్టుకు జాయింట్ చెక్ పవర్ ఉంది. అంతా తన వారే ఉంటే ఇబ్బంది ఉండదని వార్డు సభ్యుల ప్యానల్​తో పోటీకి దిగుతున్నారు.

 అయితే సర్పంచ్, వార్డు సానాల్లో పోటీ చేసే అభ్యర్థులు ఇల్లు, వాటర్ టాక్స్​ పూర్తిగా కట్టి గ్రామ సెక్రటరీ ఇచ్చే నోడ్యూస్​ సర్టిఫికెట్స్​తో నామినేషన్ వేయాలి. వారిని ప్రతిపాదించే ఓటర్​ కూడా వంద శాతం పన్ను చెల్లించాల్సి ఉంటుంది. ప్యానల్​ సిద్ధం చేస్తున్న సర్పంచ్ అభ్యర్థులు ఈ ఖర్చంతా భరిస్తున్నారు. ఏండ్ల తరబడి చెల్లించని కొందరి పన్నులు రూ.5 వేల దాకా ఉంటుంది. వార్డులో గెలుస్తారన్న నమ్మకంతో  పన్ను చెల్లిస్తున్నారు. 

కొన్ని చోట్ల ప్రత్యామ్నాయ అభ్యర్థులను వెతుకుతున్నారు. రెంజల్ మండలంలో ఒక సర్పంచ్ అభ్యర్థి శుక్రవారం రూ.లక్ష చెల్లించాడు. బోధన్ మండలంలో ఒకరికి రూ.1.5 లక్షలు ఖర్చయ్యాయి. ఎలక్షన్​ కమిషన్ రూల్​ ప్రకారం 5 వేలకు మించిన జనాభాగల పంచాయతీల్లో సర్పంచ్​గా పోటీ చేసే అభ్యర్థి ఖర్చు పరిమితి రూ.2.5 లక్షలు కాగా, వార్డుల్లో పోటీ చేసేవారు రూ.50 వేలు మాత్రమే ఖర్చు చేయాలి. ఐదు వేలలోపు జనాభాగల పంచాయతీల్లో సర్పంచ్​ ఎన్నికల ఖర్చు రూ. 1.5 లక్షలు మాత్రమే. వార్డు సభ్యుడి ఖర్చు రూ.30 వేలు దాటొద్దు. అయితే నామినేషన్ దాఖలు టైంకే ఈ పరిమితికి చేరువకావడం వారిని ఆందోళనకు గురిచేస్తోంది. అయితే ఎన్నికల పుణ్యమా అని పంచాయతీకి ఇన్​కమ్​ లభిస్తోంది.

సర్టిఫికెట్ల పరేషాన్​

జిల్లాలో 50 శాతం వార్డులు, సర్పంచ్​ స్థానాలు బీసీ, ఎస్సీ, ఎస్టీలకు రిజర్వు అయ్యాయి. అక్కడ పోటీ చేసే ఆ వర్గం అభ్యర్థులు కొత్తగా పొందిన క్యాస్ట్ సర్టిఫికెట్స్ నామినేషన్​కు జత చేయాలి. శుక్రవారం ఆన్​లైన్ సర్వర్ సమస్య ఆశావహులను టెన్షన్ పెట్టింది. ఎలక్షన్​లో పోటీ చేసే అభ్యర్థులు ఖర్చులు చూపడానికి కొత్త బ్యాంక్ అకౌంట్ ఇవ్వాలని సీఈసీ శుక్రవారం ఆదేశించింది. ఫస్ట్​ ఫేజ్ ఎన్నికల నామినేషన్ల గడువు శనివారం ముగియనుండడంతో కొత్త అకౌంట్ల కోసం బ్యాంక్​ల వద్ద రద్దీ ఏర్పడనుంది.