రాష్ట్రవ్యాప్తంగా మల్టీ పర్పస్ వర్కర్లు సమ్మెబాట పట్టడంతో సర్పంచులే సఫాయి కార్మికులుగా మారారు. ట్రాక్టర్లతో ఇంటింటికీ తిరిగి చెత్త సేకరిస్తున్నారు. తమ ఉద్యోగాలు పర్మినెంట్ చేయాలని, కనీస వేతనాలు ఇవ్వాలంటూ రాష్ట్రవ్యాప్తంగా సుమారు 43 వేల మంది పంచాయతీ కార్మికులు ఈ నెల 6 నుంచి సమ్మెకు దిగారు. దీంతో చెత్త ఎత్తేవారు, మోరీలు తీసేవారు లేక ఊర్లన్నీ కంపుకొడ్తున్నాయి. వర్షాకాలం కావడంతో ఎక్కడి నీళ్లు అక్కడే ఆగి దుర్వాసన వస్తున్నది. జనం నుంచి కూడా ఒత్తిడి పెరగడంతో సర్పంచ్లే రంగంలోకి దిగారు. పంచాయతీ ట్రాక్టర్లను ఇంటింటికీ తిప్పి చెత్త సేకరిస్తున్నారు. మురుగు కాల్వల్లో పూడిక తీసుకుంటున్నారు.
