ఖమ్మం, వెలుగు: సీతారామ ఎత్తిపోతల పథకంలో భాగంగా సత్తుపల్లి ప్రాంతానికి సాగు నీరు అందించేందుకు చేపట్టిన సత్తుపల్లి ట్రంక్కెనాల్ కు సంబంధించి ప్యాకేజీ 9, 10, 11, 12 పనులను వేగంగా పూర్తి చేయాలని వ్యవసాయ శాఖ మంత్రి తుమ్మల నాగేశ్వరరావు కోరారు.
ఈ మేరకు శుక్రవారం హైదరాబాద్ లో రాష్ట్ర నీటిపారుదల శాఖ మంత్రి ఉత్తమ్కుమార్రెడ్డిని కలిసి సీతారామ ప్రాజెక్టు పెండింగ్ పనులపై చర్చించారు. భూసేకరణ సమస్యలను పరిష్కరించాలని, పెండింగ్ బిల్లులను ప్రాధాన్యతాక్రమంలో చెల్లించేలా చర్యలు తీసుకోవాలని తుమ్మల కోరారు. ప్యాకేజీ 9, 10 పనులను వచ్చే నెలాఖరు వరకు పూర్తి చేసి బేతుపల్లి రిజర్వాయర్కు గోదావరి నీటిని అందించేలా చూడాలన్నారు.
ప్యాకేజీ 11, 12 పనులను వచ్చే ఏడాది మే నాటికి పూర్తి చేయాలని సంబంధిత అధికారులను ఆదేశించారు. అశ్వారావుపేట నియోజకవర్గంలో ప్రతిపాదించిన డిస్ట్రిబ్యూటరీ ప్యాకేజీలు 7,8కి భూసేకరణ చిక్కులు లేకుండా పైప్లైన్ నెట్వర్క్ను ప్లాన్ చేయాలని కోరారు. ఆయిల్ పామ్తో పాటు ఇతర వాణిజ్య పంటల సాగు విస్తృతంగా ఉన్నందున 2,500 ఎకరాల భూసేకరణ లేకుండా పైప్లైన్ ఏర్పాటు చేయాలన్నారు.
సీతారామ ప్రాజెక్టు కాల్వల పరిధిలో అందుబాటులో ఉన్న భూమిని వినియోగించుకొని సోలార్ప్లాంట్లను ఏర్పాటు చేసి, వాటి ద్వారా ఉత్పత్తి అయ్యే విద్యుత్ను ప్రాజెక్టు పంప్హౌస్ లకు వినియోగించే అవకాశంపై సమావేశంలో చర్చించారు. వారి వెంట కొత్తగూడెం జిల్లా ఇరిగేషన్సీఈ శ్రీనివాస్రెడ్డి ఉన్నారు.
