- పండ్లు, ఔషధ, టింబర్ జాతులకు ప్రాధాన్యత
- పర్యావరణంపై అవగాహనకు ఈఈసీ ఏర్పాటు
- పిల్లల కోసం బోటింగ్, సౌక్లింగ్పాత్లు
- రూ.2 కోట్లతో ఏర్పాటు చేస్తున్న ఎకో పార్క్
ములుగు, వెలుగు : ములుగు జిల్లా అంటేనే ప్రకృతి అందాలు, పర్యాటక కేంద్రాలకు పెట్టింది పేరు. అటవీ విస్తీర్ణం అత్యధికంగా ఉండే ఈ ప్రాంతంలో మరో బృందావనంలాంటి ఎకో పార్కును ఏర్పాటు చేస్తున్నారు. జిల్లా కేంద్రానికి 7 కిలోమీటర్ల దూరంలో 163 హైవేకు ఆనుకుని ఇంచర్ల పరిధిలో 163 ఎకరాల్లో ఈ పార్క్ను నిర్మిస్తున్నారు. రెండు నెలల్లో అందుబాటులోకి తీసుకురానున్నారు.
ఇంచర్ల ఎర్రిగట్టమ్మ వద్ద ఎకో పార్క్..
రాష్ట్ర ప్రభుత్వం అటవీశాఖ ఆధ్వర్యంలో రూ.2 కోట్లతో ఎకో పార్క్ నిర్మాణం చేపట్టారు. పంచాయతీరాజ్ శాఖ మంత్రి సీతక్క ప్రత్యేక చొరవతో 163 ఎకరాల విస్తీర్ణంలో పర్యావరణ హితంగా పార్క్ ఏర్పాటు చేస్తున్నారు. ఇందులో 55 వేల మొక్కలను నాటుతున్నారు. పండ్లు, ఔషధం, టింబర్ మొక్కలు ఉన్నాయి. ఉసిరి, మర్రి, ఇప్ప, నేరేడు, మారేడు, జమ్మి, వేప, టేకు, మద్ది, ఎగిస, వెదురు తదితర మొక్కల రకాలను నాటేందుకు చర్యలు చేపట్టారు. 163 ఎకరాల చుట్టూ ఫెన్సింగ్ ఏర్పాటు చేయడంతోపాటు స్వాగత తోరణం నిర్మాణం పూర్తయ్యింది. ఎకో పార్క్ను స్కై వ్యూ చూసేందుకు వాచ్టవర్ను ఏర్పాటు చేశారు.
చిల్డ్రన్స్ కోసం పార్కు, బోటింగ్..
పార్కులో చిన్నారులు ఆడుకునేందుకు వీలుగా ఆట వస్తువులను అమర్చేందుకు ప్లాన్చేశారు. జంపింగ్, ఉయ్యాలలు, జారుడు బండలు, పుల్అప్స్, రింగ్స్ ఇలా ఎన్నో పరికరాలు ఏర్పాటు చేస్తున్నారు. చిన్నారులు సైక్లింగ్చేసేందుకు ప్రత్యేక పాత్ ను ఏర్పాటు చేయగా, ఇప్పటికే ఈ పాత్ లో పలువురు స్పెషల్ బెటాలియన్ సిబ్బంది వాకింగ్, సైక్లింగ్చేస్తున్నారు. పార్కులో బోటింగ్, ఓపెన్జిమ్ఏర్పాటుకు చేస్తున్నారు.
ఎన్విరాన్మెంటల్ ఎడ్యుకేషన్సెంటర్..
ఎకో పార్కులో ఆహ్లాదంతోపాటు ఎడ్యుకేషన్ కూడా ఇవ్వనున్నారు. ఎన్విరాన్మెంటల్ఎడ్యుకేషన్సెంటర్ ని ఏర్పాటు చేస్తున్నట్లు రేంజ్అధికారి శంకర్ తెలిపారు. పర్యావరణం, మొక్కల రకాలు, జాతులు, ప్రకృతికి మేలు చేసేందుకు ప్రజలు చేపట్టాల్సిన అంశాలు, అటవీ సంపద, చెట్ల రకాలు, ప్రాముఖ్యత, జీవవైవిద్యం, పర్యావరణానికి కలిగే నష్టాలు, జంతువులు, పక్షులు, ఇలా ఎన్నో ప్రత్యేకతలను తెలియజేసేలా ఈఈసీని తీర్చిదిద్దనున్నారు.
మెడిటేషన్, ఓపెన్ మీటింగ్కు కూడా వసతులు కల్పిస్తున్నారు. ఎకో పార్క్ లో ఓ వైపు స్మృతి వనం ఏర్పాటు చేసి ప్రజలు మొక్కలు నాటే వారి జ్ఞాపకాలను ఉంచేలా చర్యలు తీసుకుంటున్నారు. పార్కు స్థలంలో కొన్నిచోట్ల చెక్ డ్యాంలు నిర్మించి సుందరంగా తీర్చిదిద్దనున్నారు. పిల్లలు బోటింగ్ చేసేందుకు, నీటి సంపుల్లో, చెక్ డ్యాంలలో తెలుపు, నలుపు రకాల పక్షులను ఉంచనున్నారు.
అదేవిధంగా 8 రకాల తామర పువ్వులను సైతం ఏర్పాటు చేయనున్నారు. ఇటీవల వన మహోత్సవం సందర్భంగా మంత్రి సీతక్క ఎకో పార్కులో మొక్కలు నాటి జరుగుతున్న పనులను పర్యవేక్షించారు. ఈ ఎకో పార్కు మరో రెండు నెలల్లో అందుబాటులోకి రానున్నది.
నేచర్ లవర్స్ కు ఇక్కడ మరుపురాని జ్ఞాపకాలు..
ములుగు జిల్లా నేచర్ గ్రీనరీతో మమేకమై ఉంటుంది. దానిని కాపాడుకోవడంతోపాటు ప్రజలకు ప్రకృతిపై అవగాహన కల్పించడం ఉద్దేశం. రూ.2 కోట్లతో నిర్మిస్తున్న ఎకో పార్కు ద్వారా ప్రకృతి ప్రేమికులు కుటుంబ సమేతంగా వచ్చి ఆహ్లాదం, ఆనందాన్ని పొందుతారు. ఎన్విరాన్మెంటల్ ఎడ్యుకేషన్ సెంటర్ ద్వారా గ్రూపులుగా వచ్చే విద్యార్థులకు అవగాహన కల్పిస్తాం. స్మృతి వనాలు ఎంతో ప్రాముఖ్యతను సంతరించుకుంటాయి. - రాహుల్ కిషన్ జాదవ్, జిల్లా అటవీ శాఖ అధికారి, ములుగు
