మహారాష్ట్రలోని థానేలోని విద్యా ప్రసారక్ మండల్ కళాశాలలో ఎన్ సీసీ కోసం శిక్షణ పొందుతున్న కొంతమంది విద్యార్థులపై సీనియర్లు క్రూరత్వం ప్రదర్శించారు. ముఖ్యమంత్రి ఏక్ నాథ్ షిండే స్వస్థలమైన థానేలో జరిగిన ఈ ఘటన సంచలనం సృష్టిస్తోంది.
పోలీసులు తెలిపిన వివరాల ప్రకారం.. ఓ సీనియర్ ఎన్ సీసీ శిక్షకుడు ఆరుగురు విద్యార్థులను బురదలో పడుకోబెట్టాడు. అనంతరం బురదలో పడుకున్న విద్యార్థుల వెనక భాగంలో కర్రలతో క్రూరంగా దాడి చేశాడు.
భయాందోళనకు గురైన విద్యార్థులు ఏడుస్తూ, వారిని వేడుకుంటున్న దృశ్యాలు వీడియోలో కనిపిస్తున్నాయి. ఈ వీడియో ఆలస్యంగా వెలుగులోకి వచ్చింది. ఘటనపై ఎన్సీపీ నేత జితేంద్ర అవద్ దిగ్భ్రాంతి వ్యక్తం చేశారు.
నిందితులపై కఠిన చర్యలు తీసుకోవాలని డిమాండ్ చేశారు. ఆర్మీ, నేవీతో భవిష్యత్ అవకాశాల కోసం వారిని సిద్ధం చేయడానికి జోషి-బెడేకర్ క్యాంపస్‌లో మూడు కళాశాలల విద్యార్థులకు సంయుక్తంగా ఎన్‌సీసీ శిక్షణ ఇస్తున్నారని స్థానికులు చెబుతున్నారు. ప్రిన్సిపల్ సుచిత్రా నాయక్ ఘటనపై స్పందిస్తూ నిందితుడికి కఠిన శిక్ష పడేలా చూస్తామని తల్లిదండ్రులకు హామీ ఇచ్చారు.
