నాగర్ కర్నూల్, వెలుగు: కాంగ్రెస్లో చేరక ముందే మాజీ మంత్రి జూపల్లి కృష్ణారావుకు అసమ్మతి సెగ మొదలైంది. కొల్లాపూర్తోపాటు నాగర్ కర్నూల్, వనపర్తి, గద్వాల నియోజకవర్గాల్లో తాను చెప్పిన వాళ్లకు టికెట్లు ఇవ్వాలని షరతు పెట్టారన్న వార్తలు పాలమూరు కాంగ్రెస్లో కలకలం రేపుతున్నాయి. కొల్లాపూర్, నాగర్ కర్నూల్, వనపర్తి నియోజకవర్గాల్లో కాంగ్రెస్ టికెట్లపై ఆశలు పెట్టుకున్న సీనియర్ లీడర్లు సీఆర్ జగదీశ్వర్రావు, మాజీ మంత్రి నాగం జనార్దన్ రెడ్డి, మాజీ మంత్రి జి.చిన్నారెడ్డి తదితరులు ఒక్కసారిగా అలర్ట్ అయ్యారు. వీరంతా కొద్దిరోజులుగా జూపల్లికి వ్యతిరేకంగా పావులు కదుపుతూ, తాడోపేడో తేల్చుకుంటామని సవాల్విసురుతున్నారు. ఇలాంటి టైంలో ప్రియాంక సభ రద్దు కావడంతో జూపల్లి వర్గీయులు ఒక్కసారిగా నారాజ్
అయ్యారు.
దమ్ముంటే గెలిచి చూపించాలంటూ సవాళ్లు
కొల్లాపూర్ కాంగ్రెస్ టికెట్పై ఆశలు పెట్టుకున్న సీఆర్జగదీశ్వర్ రావు జూపల్లి రాకను తీవ్రంగా వ్యతిరేకిస్తున్నారు. మూడేండ్లుగా నియోజకవర్గంలో పార్టీ బలోపేతానికి కృషి చేస్తున్నానని, చెల్లాచెదురైన క్యాడర్ను ఏకతాటిపైకి తెచ్చానని, తీరా ఇప్పుడు ఇతర పార్టీ నుంచి వచ్చిన జూపల్లికి టికెట్ఇస్తే తన పరిస్థితి ఏంటని బహిరంగంగానే మాట్లాడుతున్నారు. ఒకవేళ తనను కాదని జూపల్లికి టికెట్ ఇస్తే రూ.50 కోట్లు ఖర్చు పెట్టి అయినా సరే ఓడిస్తానని ఇటీవల సన్నిహితుల వద్ద వ్యాఖ్యానించాడంటే పరిస్థితి ఎలా ఉందో అర్థం చేసుకోవచ్చు. కొల్లాపూర్లోనే గెలవలేని జూపల్లి ఏ లెక్కన నాలుగు అసెంబ్లీ సీట్లు అడుగుతాడని మాజీ మంత్రి నాగం జనార్దన్ రెడ్డి బహిరంగంగా ఫైర్అయ్యారు. రెండు రోజుల కింద ప్రియాంక సభ సన్నాహక సమావేశంలో ఆయన మాట్లాడుతూ జూపల్లికి దమ్ముంటే ముందు కొల్లాపూర్లో గెలిచి చూపించాలని సవాల్ విసిరారు. దీంతో పీసీసీ వైస్ప్రెసిడెంట్డా.మల్లు రవి ఇరకాటంలో పడ్డారు.
తాము టికెట్లపై హామీ ఇవ్వలేదని, సర్వే ఆధారంగానే టికెట్లు ఉంటాయని వివరణ ఇచ్చుకునే ప్రయత్నం చేశారు. 2018 అసెంబ్లీ ఎన్నికల్లో బీఆర్ఎస్ అభ్యర్థి మర్రి జనార్దన్రెడ్డికి సపోర్ట్చేసి, తన ఓటమికి కారణమైన ఎమ్మెల్సీ కూచుకుళ్ల దామోదర్రెడ్డి కొడుకు రాజేశ్రెడ్డికి జూపల్లి టికెట్ఇప్పించే ప్రయత్నాలు చేస్తున్నారని నాగం ఆగ్రహంతో ఉన్నారు. వనపర్తిలోనూ తనకు వ్యతిరేకంగా జూపల్లి గ్రూపులను రెచ్చగొడుతున్నారని సీనియర్ నేత, పీసీసీ క్రమశిక్షణ కమిటీ చైర్మన్, మాజీ మంత్రి చిన్నారెడ్డి ఫైర్అవుతున్నారు. బీఆర్ఎస్లో మంత్రిగా కొనసాగిన కాలంలో కాంగ్రెస్క్యాడర్ను ఎన్నో ఇబ్బందులు పెట్టాడని, అలాంటి వ్యక్తి నుంచి పార్టీని అష్టకష్టాలు పడి బతికించుకుంటే తీరా ఇప్పుడు వచ్చి తమ సీట్లకే ఎసరు పెడుతున్నాడని వాపోతున్నారు. జూపల్లిని చేర్చుకుంటే కాంగ్రెస్కు అన్నివిధాలా నష్టమే తప్ప లాభం లేదని ఈ ముగ్గురు సీనియర్లు హైకమాండ్కు ఇప్పటికే ఫిర్యాదు చేసినట్లు చెబుతున్నారు.
చివరి నిమిషంలో సభ రద్దు
ఈ నెల 20న కొల్లాపూర్లో భారీ బహిరంగ సభ పెట్టి, ప్రియాంకగాంధీ సమక్షంలో కాంగ్రెస్లో చేరాలని జూపల్లి భావించినా చివరి నిమిషంలో రద్దు కావడంతో ఆయన వర్గీయులు కొంత నారాజ్ అయ్యారు. దీనికి తోడు సీనియర్లు జూపల్లి లక్ష్యంగా తీవ్ర విమర్శలు చేస్తుండడం, చేరికకు ముందే అసమ్మతి తీవ్రం కావడంతో అసలు జూపల్లి కాంగ్రెస్లో చేరుతారా? లేదా? అనే స్థాయిలో జనం చర్చించుకుంటున్నారు. జూపల్లి అనుచరులు మాత్రం తమ సారు కాంగ్రెస్లో చేరడం ఖాయమని, కాంగ్రెస్లో సీనియర్ల కామెంట్లను పట్టించుకోవాల్సిన పనిలేదని చెబుతున్నారు. ఆశావహుల్లో ఆందోళన సహజమేనని, కాకపోతే ఈ అలజడి వెనకాల అధికార పార్టీ ఎమ్మెల్యేల ప్రమేయం ఉండవచ్చు అనే అనుమానాలు వ్యక్తం చేస్తున్నారు.
