న్యూఢిల్లీ: వ్యవసాయం, తయారీ, మైనింగ్, నిర్మాణ రంగాల్లో మెరుగైన పనితీరు కారణంగా 2022–-23 జనవరి–-మార్చి క్వార్టర్లో భారతదేశ ఆర్థిక వ్యవస్థ 6.1 శాతం వృద్ధి చెందింది. వార్షిక వృద్ధి రేటు 7.2 శాతం ఉంది. ఈ వృద్ధి కారణంగా దేశ ఆర్థిక వ్యవస్థ 3.3 ట్రిలియన్ల డాలర్లకు చేరింది. దీనివల్ల రాబోయే కొన్ని సంవత్సరాలలో ఐదు ట్రిలియన్ డాలర్ల లక్ష్యాన్ని సాధించడం సులువు అవుతుందని ఎక్స్పర్టులు చెబుతున్నారు. 2021–-22 ఆర్థిక సంవత్సరంలో ఆర్థిక వ్యవస్థ 9.1 శాతం పెరిగింది. 2023 మొదటి మూడు నెలల్లో చైనా 4.5 శాతం ఆర్థిక వృద్ధిని సాధించింది. 2023 మార్చి క్వార్టర్లో జీడీపీ గ్రోత్ 6.1 శాతంగా నమోదైంది. అక్టోబర్-–డిసెంబర్లో ఇది 4.5 శాతం, 2022 జులై-–సెప్టెంబర్లో 6.2 శాతంగా ఉంది. నేషనల్ స్టాటిస్టికల్ ఆఫీస్ (ఎన్ఎస్ఓ) విడుదల చేసిన డేటా ప్రకారం, 2022 ఏప్రిల్–-జూన్ లో వృద్ధి 13.1 శాతం ఉంది. 2021–-22 జనవరి–-మార్చి క్వార్టర్లో జీడీపీ నాలుగు శాతం పెరిగింది. 2021–-22లో 9.1 శాతంతో పోలిస్తే 2022–-23లో వాస్తవ జీడీపీ వృద్ధిని 7.2 శాతంగా అంచనా వేశారు. 2022–-23 సంవత్సరంలో ప్రస్తుత ధరల ప్రకారం నామమాత్రపు జీడీపీ లేదా జీడీపీ వృద్ధి రేటు రూ. 234.71 లక్షల కోట్లు ( 2.8 ట్రిలియన్ డాలర్ల) నుండి రూ. 272.41 లక్షల కోట్ల ( 3.3 ట్రిలియన్ డాలర్లకు) స్థాయికి చేరుకుంటుందని అంచనా. 2022–-23 క్యూ4లో స్థిరమైన ధరల వద్ద జీడీపీ 6.1 శాతం వృద్ధి చెందింది. ఇది రూ. 41.12 లక్షల కోట్ల నుండి రూ. 43.62 లక్షల కోట్లకు పెరిగింది. 2022–-23 క్యూ4 లో ప్రస్తుత ధరల వద్ద జీడీపీని రూ. 71.82 లక్షల కోట్లుగా అంచనా వేశారు. ఇది 2021–-22 క్యూ4లో రూ. 65.05 లక్షల కోట్లు ఉండగా, ఈసారి 10.4 శాతం వృద్ధి చెందింది.
ఏడు శాతం పెరిగిన జీవీఏ
2023 మార్చితో ముగిసిన ఆర్థిక సంవత్సరంలో గ్రాస్ వాల్యూ యాడెడ్ (జీవీఏ) వృద్ధి 7 శాతంగా ఉంది, అంతకు ముందు సంవత్సరంలో 8.8 శాతం వృద్ధిని సాధించింది. తయారీ రంగంలో జీవీఏ వృద్ధి మార్చి 2023 క్వార్టర్లో 0.6 శాతం నుండి 4.5 శాతానికి పెరిగింది. గత ఆర్థిక సంవత్సరం ఇదే క్వార్టర్లో 2.3 శాతంగా ఉన్న మైనింగ్‌‌‌‌‌‌‌‌‌‌‌‌‌‌‌‌లో జీవీఏ వృద్ధి నాలుగో క్వార్టర్లో 4.3 శాతంగా ఉంది. తాజా క్వార్టర్లో కన్స్ట్రక్షన్సెక్టార్ 10.4 శాతం పెరిగింది. 2021–-22 క్యూలో ఇది 4.9 శాతం పెరిగింది. వ్యవసాయ రంగం వృద్ధి 4.1 శాతం నుంచి 5.5 శాతానికి పెరిగింది. నాలుగో క్వార్టర్లో విద్యుత్, గ్యాస్, నీటి సరఫరా ఇతర వినియోగ సేవల విభాగం 6.7 శాతం నుండి 6.9 శాతం పెరిగింది. సేవల రంగంలో జీవీఏ వృద్ధి (-- వాణిజ్యం, హోటల్, రవాణా, కమ్యూనికేషన్, ప్రసారాలకు సంబంధించిన సేవలు) 7.1 శాతం నుంచి 9.1 శాతానికి పెరిగింది. ఆర్థిక, రియల్ ఎస్టేట్ వృత్తిపరమైన సేవలు మార్చి 2023 క్వార్టర్లో 7.1 శాతం వృద్ధి చెందాయి. పబ్లిక్ అడ్మినిస్ట్రేషన్, డిఫెన్స్ ఇతర సేవలు క్వార్టర్లో 3.1 శాతం వృద్ధిని నమోదు చేశాయి. క్రితం సంవత్సరం ఇదే క్వార్టర్లో ఇవి 5.2 శాతం వృద్ధిని సాధించాయి.
ఇండియా ఎంతో ఎదిగింది... మోర్గన్ స్టాన్లీ రిపోర్ట్
న్యూఢిల్లీ: ప్రధాని నరేంద్ర మోడీ నాయకత్వంలో గత పదేళ్లలో ఇండియా ఎంతో అభివృద్ధి సాధించిందని, ఆసియా, గ్లోబల్ గ్రోత్కూ ఊతమిచ్చిందని అమెరికాకు చెందిన బ్రోకరేజీ సంస్థ మోర్గన్ స్టాన్లీ ప్రశంసించింది. ఇండియా గ్రోత్పై విదేశీ ఇన్వెస్టర్లకు మొదట్లో చాలా అనుమానాలు ఉండేవని, అవన్నీ పటాపంచలు అయ్యాయని స్పష్టం చేసింది. ఇండియా తన సత్తాను వెలికితీయలేదన్న విమర్శలను కొట్టిపారేసింది. 2014 నుంచి ఎన్నో మంచి నిర్ణయాలు తీసుకున్నారని పేర్కొంది. ఈ రిపోర్ట్ ప్రకారం..2013 నాటి ఇండియాతో ఇప్పటి ఇండియా చాలా ముందుకు వెళ్లింది. ఇంత తక్కువ సమయంలోనే ఇండియా ఆర్థిక వ్యవస్థ ఎంతో పుంజుకుంది. ప్రపంచంలోనే అత్యంత వేగంగా ఎదుగుతున్న ఆర్థిక వ్యవస్థల్లో రెండోస్థానంలో ఉంది.
కార్పొరేట్ పన్ను తగ్గించడం, ఇన్ఫ్రాస్ట్రక్చర్పై ఇన్వెస్ట్మెంట్లు పెంచడం, జీఎస్టీని తేవడం, లబ్దిదారుల ఖాతాల్లోకే నేరుగా సబ్సిడీ మొత్తాన్ని జమచేయడం, ఇన్సాల్వెన్సీ అండ్ బ్యాంక్ట్రప్ట్ కోడ్ తేవడం, ఎఫ్డీఐలపై ఫోకస్ చేయడం, రియల్టీ కోసం కొత్త చట్టం తేవడం వంటి నిర్ణయాల వల్ల ఎంతో మేలు జరిగింది. మాన్యుఫాక్చరింగ్, క్యాపిటల్ స్పెండింగ్ భారీగా పెరుగుతున్నాయి. 2031 నాటికి ఎగుమతుల మార్కెట్ రెట్టింపై జీడీపీలో 4.5 శాతానికి చేరుతాయి. ఇన్ఫ్లేషన్, పెట్రో ధరలు తగ్గుతుండటంతో కన్సంప్షన్ పెరుగుతోంది. వీటిన్నింటి వల్ల కార్పొరేట్లకు దండిగా లాభాలు వస్తున్నాయి. స్టాక్ మార్కెట్ల ఇన్వెస్టర్లకూ మేలు జరుగుతోంది. ఇక నుంచి కూడా ఇండియాకు ఇన్వెస్ట్మెంట్లు పెరుగుతాయి. గ్లోబల్ క్యాపిటల్ మార్కెట్ ఫ్లోలపై ఇండియా ఆధారపడటం తగ్గింది కాబట్టి యూఎస్ రెసిషన్, ఆయిల్ రేట్ల వంటివి పెద్దగా ప్రభావం చూపవు. ప్రస్తుతం ఇండియా తలసరి ఆదాయం 2,200 డాలర్లు ఉంది. 2032 నాటికి ఇది రెట్టింపై 5,200 డాలర్లకు చేరుకుంటుంది. దీనివల్ల డిస్క్రెషనరీ ప్రొడక్టుల అమ్మకాలు భారీగా పెరుగుతాయి.
