జ్యోతిష్య శాస్త్రం ప్రకారం శని గ్రహం కష్టాలను.. నష్టాలను కలుగజేస్తాడు. త్రయోదశితో కూడిన శనివారం అంటే శని భగవానుడికి చాలా ఇష్టం . శని గ్రహం జాతకంలో వక్ర దృష్టితో శనివారం త్రయోదశి రోజున శని భగవానుడిని పూజించాలి. అలా చేస్తే శని భగవానుడు శాంతిస్తాడని పండితులు చెబుతున్నారు. .. పంచాంగం ప్రకారం జనవరి 31 వ తేది శనివారం త్రయోదశి వచ్చింది. ఆరోజు ఎలాంటి నియమాలు పాటించాలో ఈ స్టోరీలో తెలుసుకుందాం. . .
జనవరి 31 శనివారం త్రయోదశి వచ్చింది. ఈరోజు శనికి అత్యంత ప్రీతికరమైన రోజు. కొన్ని నియమాలు పాటించడం ద్వారా శని ప్రభావం నుంచి తప్పించుకోవచ్చంటారు..
శనిత్రయోదశి వివరాలు
- శని త్రయోదశి ప్రారంభం : జనవరి 30 ఉదయం 11:09 గంటలకు
- శనిత్రయోదశి ముగింపు : జనవరి 31 ఉదయం 8:26 గంటలకు
- ఉదయ తిథి ప్రకారం జనవరి 31 శనిత్రయోదశి పూజలను ఆచరిస్తారు.
నవగ్రహాలలో ఏడవ వాడైన శనీశ్వరుడు సూర్యభగవానునికి ఛాయాదేవికి కలిగిన కుమారుడని శాస్త్రాలు చెబుతున్నాయి. మనిషి చేసే పాప, పుణ్యాల ఆధారంగా వారి నడవడికను శనైశ్చరుడు నియంత్రిస్తాడంటారు. బతికి ఉండగా చేసే పాపపుణ్యాలను శని పరిగణలోకి తీసుని న్యాయమూర్తిగా వ్యవహరిస్తే మరణానంతరం ఆ పాపపుణ్యాల ఆధారంగా శిక్షలు అమలు చేస్తారు శని సోదరుడు యమధర్మరాజు. సూర్యుని కుమారులైన శని, యమధర్మరాజు ఇద్దరూ న్యాయాధికారులే.
వాస్తవానికి శని పేరు వినగానే అందరూ భయపడతారు కానీ ఆ స్వామిని భయంతో కాకుండా భక్తితో కొలిస్తే సకలశుభాలతో పాటు ఐశ్వర్యాన్నీ ప్రసాదిస్తాడని విశ్వాసం. శనివారం -త్రయోదశి తిథి వచ్చిన రోజున శనికి నువ్వులనూనెతో అభిషేకం చేసినా ఆస్వామికి ఇష్టమైన నువ్వులు, నల్లటి వస్త్రం వంటివి దానం చేసినా శని ప్రసన్నుడవుతాడనీ ఏలినాటిశని, అర్ధాష్టమ శని బాధల నుంచి ఉపశమనం లభిస్తుందనీ భక్తుల ప్రగాఢ విశ్వాసం. వాటినుంచి పూర్తిగా తప్పించుకోలేరు కానీ కొన్ని నియమాలు పాటించడం వలన శని ప్రభావం తగ్గుతుందంటారు పండితులు.
శని శ్లోకం
నీలాంజన సమాభాసం రవిపుత్రం యమాగ్రజం
ఛాయా మార్తాండ సంభూతం,తం నమామిశనైశ్చరం
శని త్రయోదశి రోజు పాటించాల్సిన నియమాలు
- సూర్యోదయానికి ముందే తలస్నానం చేయాలి
- ఆరోగ్యం సహకరించేవారు రోజంతా ఉపవాసం ఉండి సూర్యాస్తమయం అనంతరం భోజనం చేయాలి
- శని త్రయోదశి రోజు మద్యమాంసాలు ముట్టుకోరాదు
- శివార్చన, ఆంజనేయ స్వామి ఆరాధన ద్వారా శని ప్రభావం తగ్గుతుంది
- "ఓం నమ:శివాయ" అనే పంచాక్షరీ మంత్రాన్ని జపించినా మంచిదే
- ఆకలితో అలమటించేవారికి భోజనం పెట్టాలి, మూగజీవాలకు కూడా ఆహారం ఇవ్వండి.
- ఎవరి వద్ద నుంచి ఇనుము,ఉప్పు,నువ్వులు,నువ్వులనూనె చేతితో తీసుకోవద్దు
- శనివారం రోజు నవగ్రహాల ఆలయంలో లేదా శివాలయం లో ప్రసాదం పంచండి
- నువ్వులు... బెల్లం కలిపిన ఉండను కాకికి తినిపించడం మంచిది
- శనివారం రోజు రొట్టెపై నువ్వులు వేసి కుక్కలకు పెడితే శని ప్రభావం తగ్గుతుంది
- కాలవలో కానీ నదిలో కానీ బొగ్గులు ,నల్ల నువ్వులు, మేకు శనికి నమస్కరించి వేయండి
- బియ్యపు రవ్వ, పంచదార కలిపి చీమలకు పెడితే శనిప్రభావం తగ్గుతుంది
- రాగి చెట్టుకు ప్రదిక్షణం చేయాలి
- శివాలయం లేదా నవగ్రహలయం ముందు బిచ్చగాళ్లకు ఆహారం పెట్టి, నల్లటి దుప్పటి దానం చేస్తే మంచిది.
Disclaimer: పైన అందించిన సమాచారం కేవలం అవగాహన కోసం మాత్రమే. ఈ కథనాన్ని ఇంటర్నెట్ లో అందుబాటులో ఉన్న సమాచారంతో పండితుల సలహాలను వినియోగించి రూపొందించబడింది. ఈ సమాచారాన్ని V6 వెలుగు యాజమాన్యం లేదా ఉద్యోగులు ధృవీకరించలేదు. మీకున్న సమస్యలకు ఆధ్యాత్మిక నిపుణులను సంప్రదించటం ఉత్తమం.
