పద్దెనిమిదేండ్ల వయసులో పెండ్లి.. ఇరవై మూడేండ్లకి ఒక బిడ్డ, ఇద్దరు కొడుకులు . కానీ, ఆ సంతోషం ఎంతోకాలం నిలవలేదు ఆ తల్లి ఒడిలో. రెండున్నరేండ్లకే కూతురు దూరమైంది. అయినా గుండెనిండా ధైర్యం నింపుకొని.. కొడుకులే ప్రాణంగా బతికింది. కానీ, విధి ఆటలో పెద్ద కొడుకు బ్రెయిన్ ట్యూమర్తో , చిన్న కొడుకు గుండె జబ్బుతో ఆ తల్లిని ఒంటరిని చేశారు. అప్పట్నించీ తనకంటూ మిగిలిన మనవడే ఆమె ప్రపంచం అయ్యాడు. అతడ్ని కూడా కారు ప్రమాదం గాయపరిచింది. అయినా ఆమె బతుకుతో పోరాటం ఆపలేదు. మనవడి కోసం 77 ఏండ్ల వయసులో ఫుడ్ బిజినెస్ చేస్తోంది. లక్షల్లో సంపాదిస్తున్న ముంబైకి చెందిన ఆమె పేరు ఊర్మిళ అషీర్.
‘‘నా కడుపున పుట్టిన వాళ్లంతా దూరమయ్యాక.. బతకడానికి ఓ ఆశ కల్పించాడు నా మనవడు. కానీ, 2019 లో అనుకోని ప్రమాదం తనని కూడా చావు బతుకుల మధ్యకి నెట్టింది. ప్రాణాలైతే దక్కాయి. కానీ, వాడి నవ్వు మాత్రం శాశ్వతంగా దూరమైంది. ఆ యాక్సిడెంట్లో నా మనవడి కింది పెదవి పోయింది. దాంతో ఇంట్లోంచి బయటకు వెళ్లేందుకు ఇబ్బంది పడేవాడు. తనని తానే అసహ్యించుకునేవాడు. అలా ఇంటికే పరిమితమై పోవడం వల్ల మాకు జీవనాధారంగా ఉన్న షాపు నష్టాల్లో కూరుకుపోయింది. కరోనా లాక్డౌన్ వల్ల పూర్తిగా మూసేయాల్సి వచ్చింది. దాంతో మూడు పూటలా తినడానికి లేదు. అప్పులు పేరుకుపోయాయి. మాకన్నా దీనస్థితిలో ఉన్నవాళ్లు చాలామంది ఉన్నారు.. అందుకే అవి పెద్ద సమస్యలుగా కనిపించలేదు నాకు. ఇదే విషయం నా మనవడితోనూ చెప్పా. ఆ పరిస్థితి నుంచి బయటపడటానికి నాకిష్టమైన వంటనే వ్యాపారంగా చేసుకోవాలనుకున్నా.’’
‘గుజ్జు బెన్‌ న నాస్త’ పేరుతో..
‘గుజ్జు బెన్‌ న నాస్త’ పేరుతో మొదట పచ్చళ్లు అమ్మా. ఇరవై రోజుల్లోనే 500 కేజీల పచ్చళ్ల ఆర్డర్ డెలివరీ చేశా. పచ్చళ్ల అమ్మకానికి ఎలాంటి ప్రమోషన్ చేయలేదు. ఆ నోట ఈనోట నా చేతి వంట రుచి గురించి వినే కస్టమర్స్ వచ్చారు. పెద్ద పెద్ద ఆర్డర్స్ వచ్చాయి. ఆ తర్వాత తెప్లా, ధోక్లా, పూరన్ పోలి, ఫరాలీ లాంటి గుజరాతీ శ్నాక్స్ని కూడా మెనూలో చేర్చా. ఇద్దరు డెలివరీ బాయ్స్ని పెట్టుకున్నా. సంవత్సరం తిరిగే సరికే 45 లక్షల ఆదాయం వచ్చింది. ఆ డబ్బు కంటే కూడా జనాలు హెల్దీ వంటకాల్ని తింటున్నారన్నదే ఎక్కువ సంతోషాన్నిస్తుంది నాకు. టెడెక్స్ వేదికపైనా మాట్లాడే అవకాశం వచ్చింది. వివిధ ప్రాంతాలకెళ్లి నా కథతో చాలామందిలో ధైర్యం నింపుతున్నా.’’
రేపు బాగుంటుందన్న ఆశతో..
‘గుజ్జు బెన్‌ న నాస్త’ పేరుతో యూట్యూబ్ ఛానెల్ కూడా మొదలుపెట్టా. అందులో రకరకాల వంటకాల్ని చేసి, చూపెడుతున్నా. ఉదయమంతా వంటలు చేస్తా.. మధ్యాహ్నం యూట్యూబ్ ఛానెల్ కోసం వీడియోలు రికార్డ్ చేస్తా. ఇదంతా చూసి నా మనవడు ‘ నువ్వు నా జీవితాన్ని మార్చేశావు బామ్మ’ అంటుంటాడు. కానీ, నేను దాన్ని ఒప్పుకోను. మనవళ్లు, మనవరాళ్లని ప్రొటెక్ట్ చేయడమే కదా బామ్మల పని అనేది నా నమ్మకం. అలాగే అందరూ ఏదో ఒక రోజు ఈ లోకాన్ని వదిలి వెళ్లాల్సిందే. అందుకే దానికి భయపడొద్దు. ధైర్యంగా చావుని గెలవాలి. రేపు బాగుంటుందన్న ఆశతో ఈ రోజుని సంతోషంగా గడపాలి’’ అంటున్న ఈ బామ్మ ఎందరికో ఇన్స్పిరేషన్.
