లక్నో: ఇండియా స్టార్ షట్లర్ కిడాంబి శ్రీకాంత్ ఈ ఏడాది తొలి టైటిల్ నెగ్గేందుకు అడుగు దూరంలో నిలిచాడు. సొంతగడ్డపై జరుగుతున్న సయ్యద్ మోదీ ఇంటర్నేషనల్ బ్యాడ్మింటన్ టోర్నమెంట్‌‌‌‌లో శ్రీకాంత్ ఫైనల్ చేరుకున్నాడు. విమెన్స్ డబుల్స్‌‌‌‌లో డిఫెండింగ్ చాంపియన్స్ అయిన పుల్లెల గాయత్రి–ట్రీసా జాలీ కూడా టైటిల్ ముంగిట నిలిచారు. శనివారం జరిగిన మెన్స్ సింగిల్స్ సెమీస్‌‌‌‌లో శ్రీకాంత్ 21–-15, 19–-21, 21–-13తో తన తోటి ఆటగాడు మిథున్ మంజునాథ్‌‌‌‌పై ఉత్కంఠ విజయం సాధించాడు.
సింగపూర్ ఓపెన్, థాయ్‌‌లాండ్ మాస్టర్స్ టోర్నీల్లో మిథున్ చేతిలో ఎదురైన ఓటములకు బదులు తీర్చుకున్నాడు. మూడు గేమ్స్‌ పాటు సాగిన ఈ పోరులో శ్రీకాంత్ తన అనుభవాన్ని ఉపయోగించి గెలుపొందాడు. విమెన్స్ డబుల్స్‌ సెమీస్‌‌‌‌లో ట్రీసా–గాయత్రి 21–-11, 21–-15తో మలేసియాకు చెందిన ఒంగ్ జిన్ యీ– కార్మెన్ టింగ్ జంటపై ఈజీగా గెలిచారు. గాయత్రి భుజం గాయం నుంచి కోలుకున్న తర్వాత ఆడుతున్న రెండో టోర్నీలోనే ఫైనల్ చేరడం విశేషం. విమెన్స్ సింగిల్స్‌‌‌‌లో మాత్రం ఇండియాకు నిరాశ ఎదురైంది. యంగ్‌ స్టర్స్ ఉన్నతి హుడా,తన్వీ శర్మ ఇద్దరూ సెమీస్‌‌‌‌లోనే ఇంటిదారి పట్టారు. ఉన్నతి హుడా15–-21, 10–-21తో టర్కీకి చెందిన నెప్లిహాన్ అరిన్ చేతిలో పరాజయం పాలవగా.. తన్వీ 17-–21, 16–-21తో హీనా అకేచి (జపాన్‌) చేతిలో పోరాడి ఓడింది. మిక్స్‌‌‌‌డ్ సెమీస్‌‌‌‌లో హరిహరన్–ట్రీసా ద్వయం 17–21, 19–21తో డెజన్–వర్డానా (ఇండోనేసియా) చేతిలో పరాజయం పాలైంది.
