- ఎంపీకి థ్యాంక్స్ తెలిపిన ఉద్యోగులు
కోల్బెల్ట్, వెలుగు : బొగ్గు గనుల రిటైర్డు ఉద్యోగులకు పెద్దపల్లి ఎంపీ గడ్డం వంశీకృష్ణ అండగా నిలిచారని సింగరేణి రిటైర్డ్ ఎంప్లాయీస్ వెల్ఫేర్ అసోసియేషన్ ప్రెసిడెంట్దండం రాజరాంచందర్ రావు, జనరల్సెక్రటరీ ఆళవందార్ వేణుమాధవ్ తెలిపారు. సింగరేణి రిటైర్డ్ ఉద్యోగుల పెన్షన్ పై గురువారం పెద్దపల్లి ఎంపీ పార్లమెంట్లో ప్రస్తావించడంతో ఆయనకు ఉద్యోగులు కృతజ్ఞతలు తెలిపారు.
ఈ సందర్భంగా అసోసియేషన్సభ్యులు మాట్లాడుతూ మాజీ మంత్రి కాకా వెంకటస్వామి బొగ్గు గనుల రిటైర్డ్ ఉద్యోగులను ఆదుకోవడానికి పెన్షన్ స్కీమ్ తీసుకొచ్చారని, 35 ఏండ్ల గడిచినా ఇప్పటికీ ఆప్డేట్ కాలేదన్నారు. ఈ విషయాన్ని ఎంపీ వంశీకృష్ణ పార్లమెంట్లో మరోసారి ప్రస్తావించడం అభినందనీయమన్నారు. గత పార్లమెంట్ సమావేశాల్లో కూడా ఉద్యోగుల పెన్షన్ సమస్యను ఎంపీ లేవనెత్తారని గుర్తుచేశారు.
గతంలో సీఎంపీఎఫ్కి టన్ను బొగ్గుకు రూ.20 కేటాయించినప్పటికీ పెన్షన్రివిజన్ అమలు కాలేదని, తమకు ఇప్పటికీ రూ.500 నుంచి 1000 మాత్రమే అందుతుందన్నారు. అనారోగ్యం బారిన పడిన రిటైర్డ్ఉద్యోగులకు వస్తున్న అరకొర పెన్షన్తో కనీసం మందులు కొనడానికి సరిపోవడంలేదని ఆవేదన వ్యక్తం చేశారు. రిటైర్డ్ ఉద్యోగులకు కనీసం రూ.10 వేల పెన్షన్ ఇవ్వాలని ఎంపీ వంశీకృష్ణ పార్లమెంట్లో ప్రస్తావించి తమకు అండగా నిలిచారని తెలిపారు. ఎంపీ చొరవతో రిటైర్డ్ఉద్యోగులకు పెన్షన్ పెరుగుతుందని ఆశాభావం వ్యక్తం చేశారు.
