కళ్లెదుట మనకు కావాల్సిన వాళ్లు నీళ్లలో కొట్టుకుపోతుంటే, ప్రాణాలకు తెగించైనా కాపాడుకోవడానికి ప్రయత్నిస్తాం. ఆ క్రమంలో మన ప్రాణాలకే ముప్పు రావొచ్చు లేదంటే బయటైనా పడొచ్చు. ఈ ఏనుగులూ అంతే. ఓ చిన్న ఏనుగు నీళ్లలో పడి కొట్టుకుపోతుంటే తట్టుకోలేకపోయిన పెద్ద ఏనుగులు నీళ్లలోకి దిగాయి. కాపాడే ప్రయత్నం చేశాయి. కానీ, ఫలితం దక్కలేదు. ఆ చిన్న ఏనుగు సహా ఆరు ఏనుగులు చనిపోయాయి. ఎలాగోలా ఒడ్డుకు చేరిన రెండు ఏనుగులను అధికారులు కాపాడారు. మనసుల్ని మెలేసే ఈ ఘటన థాయిలాండ్లోని ఖావో యై నేషనల్ పార్క్లో జరిగింది. పార్క్లోని హ్యూ నరోక్ వాటర్ ఫాల్(దాన్నే నరక కూపం అనీ పిలుస్తారు)లో ఏనుగు పిల్ల పడిపోయింది. దాన్ని కాపాడే ప్రయత్నంలో దానితో సహా ఆరు ఏనుగులు చనిపోయాయి. ప్రస్తుతం బతికి బయటపడిన రెండు ఏనుగులు డిప్రెషన్లో ఉండిపోయాయని పార్క్ రేంజర్లు చెబుతున్నారు. 1992లోనూ అదే వాటర్ఫాల్లో ఇలాంటి ఘటనే జరిగి 8 ఏనుగులు చనిపోయాయి. పార్క్లో దాదాపు 300 ఏనుగులున్నాయి. పార్క్లోని డోంగ్ ఫాయయిన్ ఖావో వైని యునెస్కో ప్రపంచ వారసత్వ సంపదగా గుర్తించింది.
