కొన్నిరకాల పండ్లు, కూరగాయలు, ఆకుకూరల ద్వారా ఇన్ఫెక్షన్లు వచ్చే సీజన్ వర్షాకాలం. అలాంటి ఈ కాలంలో తినే వాటి విషయంలో చాలా జాగ్రత్తలు తీసుకోవాలి. ఏ కూరగాయలు వండుకుంటే మంచిదో తెలుసుకోవడం ముఖ్యం. ఎందుకంటే అన్ని రకాల కూరగాయలు వర్షా కాలంలో తినొద్దు. తింటే వాటివల్ల మైక్రోబియల్ ఇన్ఫెక్షన్లు వచ్చే ప్రమాదం ఉంటుంది.. రైనీ సీజన్ లో ఎలాంటి కూరగాయలు తింటే ఆరోగ్యంగా ఉంటారో తెలుసుకుందాం. . .!
వర్షాకాలంలో ఆకుకూరలు తినకపోవడమేమంచిది. ఆకులపై సూక్ష్మక్రిములు ఎక్కువగా పెరుగుతాయి. అందుకని అవి తిన్నప్పుడు ఫుడ్ పాయిజనింగ్ తో పాటు గ్యాస్ట్రబుల్ వంటి సమస్యలు వస్తాయి. ఫుడ్ ఇన్ఫెక్షన్లకు దూరంగా ఉంటూ, ఆరోగ్యాన్ని కాపాడుకోవాలంటే కొన్ని రకాల కూరగాయలు తినాలి.
కాకరకాయ: రుచిలో చేదు అనుకుంటాం. కానీ కాకరకాయలో ఎన్నో పోషకాలు ఉంటాయి. వీటిని వర్షాకాలంలో తినడం వల్ల గ్యాస్ట్రో ఇంటె స్ట్రెనల్ సమస్యలకు కారణమయ్యే సూక్ష్మక్రిములు దరిచేరవు. అలాగే కాకర జీర్ణవ్యవస్థ పనితీరును మెరుగుపరుస్తుంది.
కీరదోస: బయటి ఫుడ్ తినడం వల్ల లివర్ ప్రాబ్లమ్స్ ఎక్కువగా వస్తాయి. కీరలోని హెపటోప్రొటెక్టివ్, యాంటీ ఇన్ ఫ్లెమేటరీ గుణాలు లివర్ ప్రాబ్లమ్స్ రాకుండా చేస్తాయి. అలాగే జ్వరం, సర్దితో పాటు ఈ కాలంలో వచ్చే నీరసాన్ని తగ్గిస్తాయి.
పుట్టగొడుగులు (బటన్ మష్రూమ్స్) :ఇవి మట్టిలో మొలుస్తాయి కాబట్టి వీటిని తినడంవల్ల సమస్యలు వస్తాయని చాలామంది నమ్ముతారు. వర్షాకాలంలో వీటిని డైట్ లో చేర్చుకోరు. కానీ, బటన్ మష్రూమ్స్ ను ఈకాలంలో బాగా కడిగి వండుకుని తినొచ్చు. ఇందులో తక్కువ క్యాలరీలుంటాయి. యాంటీ బ్యాక్టీరియల్, రోగనిరోధక శక్తిని పెంచే గుణాలు కూడా ఉంటాయి ఇందులో. అందువల్ల మాన్ సూన్ డైట్ లో వీటిని చేర్చుకోవచ్చు.
ముల్లంగి: వివిధ రకాల పోషకాలున్న రూట్ వెజిటబుల్ ముల్లంగి. ఇది పొట్టకి సంబంధించిన సమస్యలనుంచి, హెపటిక్ ఇన్ ఫ్లమేషన్, అల్సర్స్ తో పాటు ఎన్నోరకాల ఇన్ఫెక్షన్ల నుంచి కాపాడుతుంది. రోగనిరోధక శక్తి పెంచడంలో ఉపయోగపడే పాలీఫినాల్స్, ఐసోథియోసైనేట్స్ ముల్లంగిలో ఉంటాయి. జలుబు, జ్వరం వల్ల వచ్చే శ్వాససంబంధిత వ్యాధులను కూడా తగ్గిస్తాయి.
కందగడ్డ: ఇందులో ఎన్నోరకాల పోషక విలువలు ఉంటాయి. వర్షా కాలంలో వచ్చే గ్యాస్ట్రో సమస్యలను తగ్గించడానికి కందగడ్డ ఉపయోగపడుతుంది. ఇందులోని ఫెనోలిక్ కాంపౌండ్స్, ఫ్లేవనాయిడ్స్ ఇమ్యూనిటీ పవర్ ని పెంచుతాయి. సీజనల్ ఇన్ఫెక్షన్లు దరి చేరనీయవు.
సొరకాయ : వర్షాకాలంలో వచ్చే ఆరోగ్య సమస్యలకు సొరకాయ చెక్ పెడుతుంది. ఇందులో పాస్ఫరస్, మెగ్నీషియం, పొటాషియం పుష్కలం. అలాగే కొవ్వు పర్సెంట్ చాలా తక్కువ. సొరకాయ కూర కడుపులో మంటని తగ్గిస్తుంది. అలాగే జ్వరం, దగ్గు రాకుండా నివారిస్తుంది.
బీరకాయ : దీన్ని నేచురల్ డీటాక్సిఫయర్ చెప్పొచ్చు. ఎందుకంటే ఇది రక్తాన్ని ప్యూరిఫై చేసి, శరీరంలోని వ్యర్థాలను బయటికి పంపిస్తుంది. రోగనిరోధక శక్తిని పెంచుతుంది. బీరకాయలో కెరోటిన్, అమైనోయాసిడ్స్, ప్రొటీన్లు ఉంటాయి. వీటిని రెగ్యులర్ గా తినడం వల్ల జీర్ణశక్తి పెరుగుతుంది.
దొండకాయ :సీజనల్ గా వచ్చే సర్ది, దగ్గు, జ్వరంతోపాటు వచ్చే ఇన్ఫెక్షన్లకు దొండకాయ చెక్ పెడుతుంది. అందుకు వీటిలోని ఇన్ ఫ్లమేటరీ గుణాలే కారణం. అలాగే దొండకాయలు గ్లూకోజ్ లెవల్స్, కొలెస్ట్రాల్ ను కంట్రోల్లో ఉంచుతాయి.
