- దక్షిణ మధ్య రైల్వే నిర్ణయం
బషీర్బాగ్, వెలుగు: ప్రజల భద్రతను మరింత మెరుగుపరచడం, సురక్షితమైన రైలు కార్యకలాపాలను కొనసాగించడమే లక్ష్యంగా దక్షిణ మధ్య రైల్వే కీలక నిర్ణయం తీసుకుంది. హైదరాబాద్ (నాంపల్లి) రైల్వే స్టేషన్లో బేగంపేట వైపు ఉన్న పాత పాదచారుల వంతెనను కూల్చివేయనున్నట్లు అధికారులు వెల్లడించారు. రెడ్ హిల్స్ ప్రాంతాన్ని పబ్లిక్ గార్డెన్తో కలిపే ఈ ఫుట్ ఓవర్ బ్రిడ్జి స్టేషన్లోని ఏ ప్లాట్ఫామ్కూ అనుసంధానంగా లేకపోవడం గమనార్హం. సుమారు ఐదు దశాబ్దాల క్రితం నిర్మించిన ఈ వంతెన ప్రస్తుతం పూర్తిగా శిథిలావస్థకు చేరుకుంది.
రైల్వే యార్డ్ లైన్ల మీదుగా ఉండటంతో రైలు కార్యకలాపాలకు, ప్రజల ప్రాణాలకు ప్రమాదం కలిగే అవకాశం ఉందని అధికారులు పేర్కొన్నారు. అనుకోని ప్రమాదాలను నివారించేందుకు డిసెంబర్ 20 నుంచి 23 మధ్య ఈ ఫుట్ ఓవర్ బ్రిడ్జిని పూర్తిగా తొలగించనున్నట్లు దక్షిణ మధ్య రైల్వే ప్రకటించింది. కూల్చివేత పనుల సమయంలో అవసరమైన భద్రతా ఏర్పాట్లు చేపడతామని, అవసరమైతే రైలు కార్యకలాపాలను నియంత్రిస్తామని స్పష్టం చేసింది.
