- స్వీయ రక్షణకు విద్యార్థినులకు కరాటేలో శిక్షణ
- ప్రారంభించిన ఎస్పీ అఖిల్ మహాజన్
ఆదిలాబాద్టౌన్, వెలుగు: విద్యార్థినుల్లో ఆత్మస్థైర్యం, ఆత్మవిశ్వాసం పెంచేందుకు ఆదిలాబాద్ జిల్లా పోలీసులు ‘ఆపరేషన్ జ్వాల’కు శ్రీకారం చుట్టారు. విద్యార్థినులకు పోలీసులు కరాటే లో శిక్షణ ఇచ్చే కార్యక్రమాన్ని శుక్రవారం జిల్లా కేంద్రంలోని మహాత్మ జ్యోతిబాపూలే బాలికల పాఠశాల, కాలేజీలో ఎస్పీ అఖిల్ మహాజన్ ప్రారంభించారు. ఈ సందర్భంగా ఆయన మాట్లాడుతూ.. ఆపద సమయంలో విద్యార్థినులకు స్వీయ రక్షణ తప్పనిసరి.. అందుకే పోలీస్ శాఖ ఆధ్వర్యంలో కరాటే శిక్షణ తరగతులు ప్రారంభించినట్లు పేర్కొన్నారు.
పోలీసులు, ప్రభుత్వ , ప్రైవేటు కరాటే అధ్యాపకుల సహకారంతో ప్రతి రోజూ సాయంత్రం ప్రత్యేక శిక్షణ తరగతులు నిర్వహిస్తామన్నారు. జిల్లావ్యాప్తంగా అన్ని పాఠశాలల్లో విడతల వారీగా శిక్షణ ప్రారంభించనున్నట్లు తెలిపారు. కార్యక్రమంలో ఉట్నూరు ఎఎస్పీ కాజల్ సింగ్, డీఈఓ శ్రీనివాస్ రెడ్డి, డీఎస్పీ ఎల్.జీవన్ రెడ్డి, ఉపాధ్యాయులు, శిక్షకులు, విద్యార్థులు, తదితరులు పాల్గొన్నారు.
