- సప్లిమెంటరీ రిజల్ట్ రిలీజ్ చేసిన అధికారులు
హైదరాబాద్, వెలుగు: టెన్త్ అడ్వాన్స్డ్ సప్లిమెంటరీ ఫలితాలు రిలీజ్ అయ్యాయి. 80.59 శాతం మంది పాసైనట్టు అధికారులు ప్రకటించారు. జూన్ 14 నుంచి 22 వరకు టెన్త్ అడ్వాన్స్ డ్ సప్లిమెంటరీ పరీక్షలు జరిగాయి. 71,695 మంది రిజిస్టర్ చేసుకోగా, 66,732 మంది అటెండ్ అయ్యారు. వీరిలో 53,777 (80.59%) మంది పాసయ్యారు. కాగా, 38,888 మంది బాలురు పరీక్ష రాయగా, 30,528 (78.50%) మంది ఉత్తీర్ణత సాధించారు, 27,844 మంది బాలికలు పరీక్ష రాస్తే 23,249 (83.50%) మంది పాసయ్యారు.
పాస్ పర్సంటేజీలో సిద్దిపేట జిల్లా 99.47% టాప్ లో ఉండగా, ఆ తర్వాతి స్థానంలో జనగామ (99.45%), సంగారెడ్డి (98.42%) ఉన్నాయి. చివరి స్థానంలో జగిత్యాల (53.69%), వికారాబాద్ (55.29%) నిలిచాయి. వాల్యుయేషన్ సెంటర్ల నుంచి కొంత సమాచారం రాకపోవడంతో, కొందరి ఫలితాలను విత్ హెల్డ్లో పెట్టామని, త్వరలోనే ఆ ఫలితాలు రిలీజ్ చేస్తామని ప్రభుత్వ పరీక్షల విభాగం డైరెక్టర్ కృష్ణారావు తెలిపారు. ఇంటర్నెట్ ద్వారా పది రోజుల్లోపు ఫలితాలు తెలుసుకునే అవకాశముందని చెప్పారు. రీకౌంటింగ్, రీవెరిఫికేషన్ కోసం అప్లై చేయాలనుకునే విద్యార్థులు ఈ నెల 18 వరకు చలాన్ తీసి డైరెక్టరేట్ కు పంపించాలని కోరారు.
ఇంటర్ ఫస్టియర్లో 63%.. సెకండియర్లో 46%
ఇంటర్మీడియెట్ అడ్వాన్స్ డ్ సప్లిమెంటరీ ఫలితాలు విడుదలయ్యాయి. ఫస్టియర్లో 63% మంది, సెకండియర్లో 46% మంది పాసయ్యారు. శుక్రవారం మధ్యాహ్నం ఇంటర్ బోర్డు అధికారులు ఫస్టియర్, సెకండియర్ ఫలితాలను వెబ్ సైట్లో పెట్టారు. రాష్ట్రంలో జూన్ 12 నుంచి 20 వరకు సప్లిమెంటరీ పరీక్షలు జరిగాయి. ఫస్టియర్ జనరల్ కోర్సుల్లో 2,52,055 మంది పరీక్ష రాయగా, 1,57,741 (63%) పాసయ్యారు. దీంట్లో 1,12,165 మంది ఇంప్రూవ్ మెంట్ రాయగా, మరో 45,576 మంది నాన్ ఇంప్రూవ్ మెంట్ కింద ఎగ్జామ్ రాశారు. అయితే, పాసైన వారిలో ఏ గ్రేడ్ సాధించిన వారు 75,541 మంది. బీ గ్రేడ్ 36,015 మంది, సీ గ్రేడ్ లో 24,580, డీ గ్రేడ్లో 21,605 మంది ఉన్నారు.
ఒకేషనల్ కేటగిరీలో 18,697 మంది పరీక్షలు రాయగా,10,319 మంది పాసయ్యారు. సెకండియర్ జనరల్ కేటగిరీలో 1,29,494 మంది పరీక్ష రాయగా, 59,669 (46%) మంది పాసయ్యారు. ఒకేషనల్లో 11,013 మంది రాయగా 6,579 మంది ఉత్తీర్ణత సాధించారు. రీకౌంటింగ్, రీవెరిఫికేషన్ కోసం విద్యార్థులు ఈ నెల 12 వరకు అప్లై చేసుకోవచ్చని ఇంటర్ బోర్డు సెక్రటరీ నవీన్ మిట్టల్ తెలిపారు. ఫస్టియర్లో 32 మందిపై, సెకండియర్లో 8 మందిపై మాల్ ప్రాక్టీస్ కేసులు నమోదు చేశామని ప్రకటించారు. ఫస్టియర్లో ఒకరు, సెకండియర్లో 8 మంది ఫలితాలను విత్ హెల్డ్లో పెట్టినట్టు చెప్పారు.