తెలుగు, తమిళ చిత్ర పరిశ్రమల్లో అగ్ర కథానాయికగా దూసుకుపోతున్న సమంత, తన కెరీర్, ఆరోగ్యం, భవిష్యత్తు ప్రణాళికల గురించి ఆసక్తికరమైన విషయాలను ఇటీవల ఒక ఇంటర్వ్యూలో పంచుకున్నారు. సుమారు 15 ఏళ్ల తన సినీ ప్రయాణంలో తాను ఎన్నో అనుభవాలను నేర్చుకున్నానని తెలిపారు. వ్యక్తిగతంగా, వృత్తిపరంగా చాలా మార్పు వచ్చిందని చెప్పుకొచ్చారు..
సినిమాల సంఖ్య కాదు, నాణ్యతే ముఖ్యం
నేను ఎన్ని సినిమాలు చేశానన్నది ముఖ్యం కాదు, మనం చేసిన చిత్రాల నాణ్యతే ముఖ్యమని నేను ఎల్లప్పుడూ నమ్ముతాను అని సమంత స్పష్టం చేశారు. గతంలో తాను గుర్తింపు కోసమో లేదా కమర్షియల్ సక్సెస్ కోసమో సినిమాలు ఎంచుకోలేదని, తన మనసుకు దగ్గరగా ఉన్న కథలనే ఎంపిక చేసుకున్నానని ఆమె వివరించారు. లవ్ స్టోరీస్, ఎమోషనల్ రోల్స్, యాక్షన్ డ్రామాలు వంటి విభిన్నమైన పాత్రలను పోషించి ప్రేక్షకులను ఆకట్టుకున్న సమంత, ఈ విధానమే తన విజయానికి కారణమని నమ్ముతున్నారు.
ఆరోగ్యానికి ప్రాధాన్యత, పని తగ్గించుకుంటున్నా
తన కెరీర్లో ఎంతో బిజీగా గడిపిన సమంత, ఇప్పుడు తన పని విధానాన్ని మార్చుకుంటున్నట్లు తెలిపారు. ఇకపై తక్కువ సినిమాలే చేస్తాను. నా శారీరక, మానసిక ఆరోగ్యానికి నేను అధిక ప్రాధాన్యత ఇస్తున్నాను. నా శరీరం చెప్పినట్టు వింటాను. ఒకేసారి ఎక్కువ ప్రాజెక్టులు చేయడం లేదు అని ఆమె అన్నారు. మయోసైటిస్ అనే అరుదైన వ్యాధితో పోరాడిన తర్వాత, ఆరోగ్యం విలువను తాను పూర్తిగా అర్థం చేసుకున్నానని ఆమె చెప్పారు. పనిని తగ్గించినప్పటికీ, ప్రేక్షకుల మనసుకు హత్తుకునే మంచి ప్రాజెక్టులతోనే ముందుకు వస్తానని సమంత భరోసా ఇచ్చారు. ఈ నిర్ణయం ఆమె అభిమానులకు కొంత నిరాశ కలిగించినా, ఆమె ఆరోగ్యంపై శ్రద్ధ తీసుకోవడం పట్ల వారు హర్షం వ్యక్తం చేస్తున్నారు. భవిష్యత్తులో సమంత ఎలాంటి విభిన్నమైన పాత్రలతో వస్తారో అని అభిమానులు ఎంతో ఆసక్తిగా ఎదురుచూస్తున్నారు.
