తలకి హెల్మెట్....కాళ్లకి ప్యాడ్స్..చేతిలో బ్యాట్.. జెట్ స్పీడ్లో దూసుకొస్తున్న బంతులు..వాటిని అంతే వేగంగా తిప్పి కొడుతున్న మెహక్ ఫాతిమా..ప్రతి బంతీ బౌండరీ దాటుతోంది. ఎటు చూసినా సిక్స్లు, ఫోర్లే కనిపిస్తున్నాయ్. దానికి సంబంధించిన వీడియో ఇప్పుడు ట్విట్టర్లో సెన్సేషన్ అవుతోంది. ప్రముఖులతో బేష్ అనిపించుకుంటోంది. దీనికి కారణం తన టాలెంట్ ఒక్కటే కాదు. అంత చిన్న వయసులో ఆ చిన్నారి ఎదుర్కొన్న వివక్ష. దాన్ని ప్రశ్నించిన తీరు కూడా.
ఆడపిల్ల అని...
సోషల్ మీడియా స్టార్గా నిలిచిన మెaహక్ సొంతూరు కేరళలోని కొజికోడ్. ఈ చిన్నారి తండ్రి మునీర్ క్రికెటర్. స్కూల్, కాలేజీల తరపున కొన్ని టోర్నమెంట్స్ కూడా ఆడాడు. కానీ, కుటుంబ బాధ్యతలు తనకిష్టమైన క్రికెట్ని దూరం చేశాయి. ఫ్యామిలీ బిజినెస్ వైపు నడిపించాయి. దాంతో తన డ్రీమ్ని తన పిల్లల ద్వారా నెరవేర్చుకోవాలి అనుకున్నాడు మునీర్. తన మూడేళ్ల కొడుక్కి క్రికెట్ నేర్పించడం మొదలుపెట్టాడు. మెహక్కి క్రికెట్ అంటే చాలా ఇష్టం. కానీ, తనకన్నా చిన్నవాడైన తమ్ముడికి తండ్రి క్రికెట్ నేర్పించడం చూసి బాధపడింది. దాంతో ‘నేను ఆడపిల్లని అనేగా క్రికెట్కి దూరంగా ఉంచుతున్నావ్.. ’ అని తండ్రిని అడిగింది. ఆ ప్రశ్న మునీర్ని ఆలోచింపజేసింది..తనేం తప్పు చేస్తున్నాడో అర్థమయ్యింది.
ఎనిమిది నెలల్లో..
2020 వ సంవత్సరం నవంబరులో క్రికెట్ ప్రాక్టీస్ మొదలుపెట్టింది మెహక్. తండ్రి సపోర్ట్తో ఎనిమిది నెలల్లోనే భారీ షాట్స్ కొడుతోంది. ఏ దిక్కు నుంచి బంతి వచ్చినా నిమిషాల్లో కొట్టడం చూసి తండ్రే షాక్ అయ్యాడు. తన కూతురి టాలెంట్ని ప్రపంచానికి పరిచయం చేయాలని..మెహక్ బ్యాటింగ్ చేస్తున్న వీడియోని ట్విట్టర్లో పోస్ట్ చేశాడు. కొద్దిసేపటికే ఆ వీడియోకి కుప్పలుతెప్పలుగా లైక్స్, షేర్స్ వచ్చిపడ్డాయ్. ఇండియన్ క్రికెట్ టీమ్ కెప్టెన్ మిథాలీ రాజ్ కూడా ఈ చిన్నారి గురించి ట్వీట్ చేసింది. ‘‘నీకు నా సపోర్ట్, బ్లెస్సింగ్స్ ఎప్పుడూ ఉంటాయి. నీలా స్పోర్ట్స్ వైపు అడుగులేస్తున్న ప్రతి అమ్మాయినీ నేను సపోర్ట్ చేస్తా. అని రాసింది. నా నుంచి ఏదైనా సాయం కావాలంటే ఒక్క మెసేజ్ చేయండి’’అని మెహక్ పేరెంట్స్ని కోరింది మిథాలీ రాజ్.‘‘ఫ్యూచర్ సూపర్స్టార్’’ అంటూ ట్వీట్ చేసిన ఆనంద్ మహీంద్ర ‘‘ఈ చిన్నారి టాలెంట్ని వేస్ట్కానివ్వద్దు” అన్నాడు.
మెహక్ ఫాతిమా..వయసు ఆరేళ్లు..ఇంత చిన్న పాప గురించి ఏంటి డిస్కషన్ అంటారా! ఈ చిన్నారి స్పెషాలిటీ అలాంటిది మరి. పిట్ట కొంచెం కూత ఘనం అన్నట్టు చిన్న వయసులోనే తన బ్యాటింగ్తో అందర్నీ మెప్పిస్తోంది ఈ చిచ్చర పిడుగు. రీసెంట్గా ఈ చిన్నారి ఫ్యాన్స్ లిస్ట్లో ఇండియన్ విమెన్ క్రికెట్ టీమ్ కెప్టెన్ మిథాలీ రాజ్, క్రికెటర్ జెమీమా రోడింగ్స్, ఆనంద్ మహీంద్రా కూడా చేరిపోయారు. ట్విట్టర్ కూడా ఈ చిన్నారి టాలెంట్కి సలాం చేస్తోంది.