- స్థానిక ఎన్నికల సన్నద్ధతపై కార్యాచరణ
- కేబినెట్‌‌కు నోట్ ఫైల్ రెడీ చేయాలన్న సీఎస్
హైదరాబాద్, వెలుగు: పంచాయతీ ఎన్నికలపై రాష్ట్ర ప్రభుత్వం కసరత్తు మొదలు పెట్టింది. బుధవారం సీఎస్ రామకృష్ణారావుతో పంచాయతీరాజ్, గ్రామీణాభివృద్ధిశాఖల ప్రిన్సిపల్ సెక్రటరీ శ్రీధర్, డైరెక్టర్ సృజనతో కీలక భేటీ జరిగినట్లు తెలిసింది. ఇప్పటికే స్థానిక ఎన్నికలు నిర్వహించాలని ప్రభుత్వంపై ఒత్తిడి వస్తున్నది. దీంతోపాటు స్థానిక ఎన్నికలు జరగకపోవడంతో కేంద్రం నుంచి రావాల్సిన ఆర్థిక సంఘం నిధులు దాదాపు రూ.3 వేల కోట్లు నిలిచిపోయాయి.
బ్యాలెట్ బాక్సులు, బ్యాలెట్ పత్రాలు జిల్లాలకు చేరుకుని నెలులు గడుస్తున్నది. ఈ క్రమంలో వాటి భద్రతపై సీఎస్ ఆరా తీసినట్లు సమాచారం. సిబ్బంది శిక్షణ తదితర అంశాలపై చర్చించినట్లు తెలిసింది. త్వరలో క్యాబినెట్ సమావేశం జరగనుండటంతో స్థానిక ఎన్నికల నిర్వహణకు సంబంధించి నోట్ ఫైల్ రెడీ చేయాలని సీఎస్ పంచాయతీ ఆఫీసర్లకు ఆదేశించారు. దీనికితోడు ఈ నెల 24న హైకోర్టులో స్థానిక ఎన్నికల కేసు విచారణకు రానున్నది. ఎన్నికలపై ప్రభుత్వం తరఫున కోర్టుకు అందించాల్సిన రిపోర్టుపైనా చర్చించినట్లు సమాచారం.
ఈ సారి క్యాబినెట్ సమావేశంలో స్థానిక సంస్థల ఎన్నికల అంశంపై చర్చించే అవకాశం ఉండటంతో అందుకు సంబంధించిన పూర్తిస్థాయిలో నోట్ ఫైల్ ప్రిపేర్ చేయాలని సీఎస్ చెప్పినట్లు తెలిసింది. పంచాయతీల్లో ఇబ్బందులు, కేంద్ర నుంచి రావాల్సిన ఫండ్స్ వివరాలు, ఎన్నికలు ఆలస్యం అవుతున్న కొద్దీ గ్రామాల్లో తలెత్తే సమస్యలు, తదితర అంశాలపై పూర్తిస్థాయి నోట్ ఫైల్ రెడీ చేయాలని ఆదేశించినట్లు సమాచారం.
