రెండేళ్లుగా స్టాంప్ డ్యూటీ, మ్యుటేషన్ ఫీజులను ఇవట్లే
స్టాంప్స్ అండ్ రిజిస్ట్రేషన్ శాఖ నుంచి బల్దియాకు రావాల్సిన నిధులను వాడుకుంటున్న రాష్ట్ర ప్రభుత్వం
హైదరాబాద్, వెలుగు: జీహెచ్ఎంసీకి వస్తున్న ఏ నిధులనూ రాష్ట్ర ప్రభుత్వం వదలడం లేదు. అప్పుల్లో కూరుకుపోతున్న బల్దియాను ఆదుకోకపోగా.. కేంద్ర ప్రభుత్వం బల్దియాకు కేటాయిస్తున్న నిధులను కూడా వాడుకుంటోంది. వీటితో పాటు స్టాంప్స్ అండ్ రిజిస్ట్రేషన్ శాఖ నుంచి బల్దియాకు రావాల్సిన స్టాంపు డ్యూటీ, మ్యుటేషన్ ఫీజులను సైతం ఇవ్వడం లేదు. 2020–21, 2021–22 ఆర్థిక ఏడాదికి సంబంధించి జీహెచ్ఎంసీకి చెల్లించాల్సిన స్టాంపు డ్యూటీ, మ్యుటేషన్ ఫీజులను స్టాంప్స్ అండ్ రిజిస్ట్రేషన్ శాఖ రాష్ట్ర ప్రభుత్వం ఖాతాలో జమ చేసింది. కానీ నేటికీ ఆ నిధులను మాత్రం జీహెచ్ఎంసీకి ఇవ్వడం లేదు. కనీసం స్టాంప్స్ అండ్ రిజిస్ట్రేషన్ శాఖ నుంచి రాష్ట్ర సర్కారు ఖాతాలోకి వచ్చిన నిధుల వివరాలను కూడా బల్దియాకు చెప్పడం లేదు. దీంతో బల్దియాకు రోజురోజుకు మరింత అప్పుల్లోకి వెళ్తోంది. టౌన్ ప్లానింగ్, ప్రాపర్టీ ట్యాక్స్ తర్వాత స్టాంప్స్ అండ్ రిజిస్ట్రేషన్ శాఖ నుంచే బల్దియాకు ఎక్కువ ఆదాయం వస్తుంది. కానీ ఈ నిధులను ప్రభుత్వమే తీసుకుంటుండటంతో బల్దియాపై భారం పడుతోంది. జీహెచ్ఎంసీకి రావాల్సిన స్టాంపు డ్యూటీ, మ్యుటేషన్ ఫీజుల నిధులను ఇవ్వాలంటూ స్టాంప్స్ అండ్ రిజిస్ట్రేషన్ శాఖకు అధికారులు కొన్ని నెలల కిందట లెటర్ రాశారు. ఈ నిధులను రాష్ట్ర ప్రభుత్వం ఖాతాలో ఎప్పుడో జమ చేశామంటూ ఆ శాఖ నుంచి జీహెచ్ఎంసీకి సమాధానం వచ్చింది. ఇదే అంశంపై బల్దియా అధికారులు ఫైనాన్స్ డిపార్ట్ మెంట్తో మాట్లాడగా.. తొందరలోనే చెల్లిస్తామని చెప్పినట్లు సమాచారం.
రూ.1,200 కోట్లు రావాలె..
2020–21, 2021–22 ఆర్థిక ఏడాదికి సంబంధించిన స్టాంపు డ్యూటీ, మ్యుటేషన్ ఫీజులు దాదాపుగా రూ.1,200 కోట్లు ఉంటాయని బల్దియా అధికారులు చెబుతున్నారు. 4 రోజుల కిందట జరిగిన కౌన్సిల్ మీటింగ్లోనూ కమిషనర్ లోకేశ్ కుమార్ ఇదే విషయాన్ని చెప్పారు. కానీ ఈ నిధులను ఎందుకు ఇవ్వడం లేదనే దానిపై ప్రభుత్వం నుంచి క్లారిటీ రాలేదు. జీహెచ్ఎంసీకి సంబంధించి అన్ని విషయాల్లో రాష్ట్ర ప్రభుత్వం నిర్లక్షంగానే వ్యవహరిస్తోంది. ఏ నిధులను ఇవ్వకపోవడం వల్లే బల్దియా అప్పుల్లోకి వెళ్లిందనే విమర్శలు వస్తున్నాయి.
