హైదరాబాద్, వెలుగు: ఉద్యోగాలు భర్తీ చేయాలన్న సోయి.. ప్రభుత్వానికి లేదని టీజేఎస్ చీఫ్ ప్రొఫెసర్ కోదండరాం విమర్శించారు. పరీక్షల నిర్వహణలో ప్రభుత్వం విఫలమైందని శనివారం ప్రకటనలో పేర్కొన్నారు. అభ్యర్థుల బయోమెట్రిక్ తీసుకుని ఉంటే గ్రూప్ 1 పరీక్ష రద్దయ్యేది కాదన్నారు. ‘‘పరీక్ష రాసినోళ్ల కంటే ఓఎంఆర్ షీట్లు ఎక్కువ ఉండటం సర్కార్ బాధ్యతారాహిత్యాన్ని తెలియజేస్తోంది. పరీక్ష మొదలైన గంటలోగా ఎంతమంది అటెండ్ అయ్యారన్న వివరాలు టీఎస్పీఎస్సీకి అందుతాయి.
అలాంటప్పుడు ఓఎంఆర్ షీట్లు ఎక్కువ ఎలా ఉంటాయి? టీఎస్పీఎస్సీ నిర్లక్ష్య ధోరణికి తోడు ఎన్నికల కంటే ముందే పరీక్ష పూర్తి చేయాలని ప్రభుత్వం తొందరపడింది. అందుకే ఇన్ని తప్పులు జరిగాయి. టీఎస్ పీఎస్సీ బోర్డును రద్దు చేయాలని అందరూ అడుగుతున్నా ప్రభుత్వం పట్టించుకోవడం లేదు. గ్రూప్ 1 లీకేజీపై సిట్టింగ్ జడ్జితో విచారణ జరిపించాలి” అని డిమాండ్ చేశారు.
