విత్తన బిల్లు రాష్ట్రాల అధికారాలను హరిస్తుంది..నకిలీ విత్తనాల నియంత్రణ అధికారం రాష్ట్రాలకే ఉండాలి

• బిల్లుపై అగ్రివర్సిటీలో రాష్ట్రస్థాయి సంప్రదింపుల సమావేశంలో వ్యాఖ్య..
• మంత్రి తుమ్మల నాగేశ్వరరావు

హైదరాబాద్, వెలుగు: కేంద్రం తీసుకొస్తున్న విత్తన బిల్లు-2025 రాష్ట్ర ప్రభుత్వాల అధికారాలను హరించడమే కాకుండా, రైతుల ప్రయోజనాలకు వ్యతిరేకంగా ఉందని వ్యవసాయ శాఖ మంత్రి తుమ్మల నాగేశ్వర్​రావు ఆరోపించారు. శుక్రవారం ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయంలో రాష్ట్ర స్థాయి సంప్రదింపుల సమావేశంలో ఆయన ముఖ్య అతిథిగా పాల్గొన్నారు. ఈ సందర్భంగా మాట్లాడుతూ.. విత్తన బిల్లు రాజ్యాంగ భావనకు, ఫెడరల్ విధానానికి విరుద్ధంగా ఉందని విమర్శించారు. 

“వ్యవసాయం రాష్ట్ర జాబితాలోని అంశం అయినప్పటికీ, విత్తనాల రిజిస్ట్రేషన్, సర్టిఫికేషన్, లైసెన్సింగ్, నాణ్యత నియంత్రణ, ధరల నిర్ణయం వంటి కీలక అధికారాలను కేంద్రం తన చేతుల్లోకి తీసుకుంటున్నది. నకిలీ విత్తనాలపై చర్య తీసుకోవాలన్నా కేంద్ర అనుమతి తప్పనిసరి చేశారు. ఇది రాష్ట్రాల స్వయంప్రతిపత్తికి విఘాతం” అని తెలిపారు.

నష్టపరిహారంపై బిల్లులో స్పష్టత లేదు

నాణ్యత లోపం ఉన్న విత్తనాల వల్ల రైతులకు నష్టం వాటిల్లితే పరిహారం ఇవ్వాల్సిన బాధ్యత ఎవరిది అనే స్పష్టత బిల్లులో లేదని మంత్రి తుమ్మల పేర్కొన్నారు. “తెలంగాణలోనే దేశంలోని 40 శాతం విత్తన ఉత్పత్తి జరుగుతున్నది. ఇక్కడి 10 లక్షల మంది విత్తన రైతులకు నష్టం వచ్చినప్పుడు పరిహారం ఇచ్చే నిబంధన ఉండాలి” అని డిమాండ్ చేశారు.

విత్తనాలపై ఆందోళన

విదేశాల్లో ఉత్పత్తి అయిన విత్తనాలను అక్కడి సర్టిఫికేషన్‌‌‌‌‌‌‌‌తోనే భారత్‌‌‌‌‌‌‌‌లో అమ్మే అవకాశం కల్పిస్తుండటంతో నకిలీ విత్తనాల ప్రమేయం పెరిగే ప్రమాదం ఉందని మంత్రి తుమ్మల హెచ్చరించారు. “మన దేశంలో ట్రయల్స్, స్థానిక సర్టిఫికేషన్ తర్వాతే అమ్మకం అనే నిబంధన తప్పనిసరి” అని సూచించారు. 

రాష్ట్రాల అభ్యంతరాలు పరిగణనలోకి తీసుకోవాలి..“రైతు ప్రయోజనాలు, రాష్ట్ర హక్కులను కాపాడేలా బిల్లులో సవరణలు చేయాలి” అని మంత్రి కోరారు. ఈ అంశంపై సీఎం రేవంత్ రెడ్డితో చర్చించి, శాసనసభలో, పార్లమెంటులో గట్టిగా పోరాడతామని హామీ ఇచ్చారు. వర్సిటీ ఉపకులపతి అల్దాస్ జానయ్య మాట్లాడుతూ ఈ బిల్లులో రైతుల రక్షణ, నష్టపరిహారం, సాంప్రదాయ విత్తనాల సంరక్షణకు సంబంధించి ఎనిమిది సవరణలు తప్పనిసరి అని పేర్కొన్నారు.